Ema Izraél barak adora fali maromak falsu sira, tan neʼe Jeová husik ema Filístia atu domina sira-nia rai. Maibé iha mós ema Izraél balu neʼebé hadomi Jeová. Sira ida mak Manoá. Nia no ninia feen la iha oan. Loron ida, Jeová haruka ninia anju atu koʼalia ho Manoá nia feen. Anju hatete: ‘Ó sei iha oan-mane ida. Nia sei salva ema Izraél husi ema Filístia nia liman. Nia sei sai ema Nazireu.’ Ó hatene Nazireu mak ema hanesan saida? Sira mak Maromak nia atan neʼebé simu knaar espesiál. Sira labele tesi sira-nia fuuk.

Depois, Manoá nia oan moris no nia hanaran Sansão. Bainhira Sansão sai boot, Jeová halo nia iha forsa boot tebes. Nia bele oho leaun ho liman-tanan deʼit. Iha tempu ida, Sansão mesak oho mane Filístia naʼin-30. Ema Filístia odi tebes nia no buka dalan oioin atu oho nia. Kalan ida kuandu Sansão toba hela iha Gaza, sira hein nia iha sidade nia portaun atu nuneʼe sira bele oho nia iha dadeer. Maibé iha kalan-boot, Sansão hadeer no bá sidade nia portaun hodi fokit sai portaun neʼe. Nia hulan portaun neʼe no lori ba foho-tutun besik Hebron!

Tuirmai, ema Filístia bá hasoru Sansão nia namorada, Dalila, no hatete: ‘Ami sei fó osan-mutin barak ba ó se ó fó-hatene ami saida mak halo Sansão forsa tebes. Ami hakarak kaer nia no hatama ba komarka.’ Dalila hakarak osan, entaun nia konkorda. Foufoun, Sansão lakohi fó-hatene ba Dalila. Maibé Dalila kontinua husu no obriga beibeik Sansão toʼo ikusmai Sansão rende an no fó sai ninia segredu. Sansão hatete: ‘Haʼu-nia fuuk nunka tesi tanba haʼu ema Nazireu. Se haʼu-nia fuuk tesi tiha, haʼu-nia forsa sei lakon.’ Sansão halo sala boot duni hodi fó sai ninia segredu, loos ka lae?

 Dalila fó-hatene kedas ba ema Filístia: ‘Haʼu hatene ninia segredu!’ Dalila halo Sansão toba-dukur iha ninia hitin, tuirmai nia haruka ema ida tesi Sansão nia fuuk. Depois, Dalila hakilar: ‘Sansão, ema Filístia sira iha neʼe ona!’ Sansão hadeer, maibé nia la iha ona forsa. Ema Filístia kaer nia, halo nia matan-delek, no hatama ba komarka.

Loron ida, ema Filístia rihun ba rihun halibur iha sira-nia maromak Dagon nia templu no haklalak hodi dehan: ‘Ita-nia maromak entrega ona Sansão mai ita! Lori Sansão sai mai atu ita bele goza nia.’ Sira lori nia no halo nia hamriik entre templu nia riin rua, no sira goza nia. Sansão hakilar ho lian makaʼas: ‘Oh Jeová, favór ida fó forsa mai haʼu dala ida deʼit.’ Iha tempu neʼebá Sansão nia fuuk komesa naruk ona. Nia dudu templu nia riin sira-neʼe ho forsa tomak. Templu neʼe monu no ema hotu iha neʼebá mate, inklui Sansão.