Maro tamo o Israelitao ty nanompo sampy indraike, le nenga i Jehovah ho fehé o Filistinao ty tane iareo. Ndra tie teo zay, le mbe nisy Israelita nanompo i Jehovah. Agnisa izay ty Manoa. Tsy nanagn’anake iareo mirovaly. Nagnirake ty anjeli’e hirehake amy i valy i Manoay ty Jehovah tie: ‘Hanagn’anake lahilahy rehe, le ie ty hagnavotse o Israelitao amo o Filistinao. Ho Nazirita reke.’ Fanta’o vao o Nazirita zao? O Nazirita zao, ndaty manao fanompoagne manokagne hoahy i Jehovah sady tsy magnitsike ty volo’e.

Niterake ana-dahy ty Manoa naho fa tafara atoy, le Samsona ty natao’e agnara’e. Natao i Jehovah matanjake reke naho fa nibey. Nahafate liona reke, ie amy izao tsy nisy raha ty tan-tagna’ey. Filistina 30 ka ty mate’e. Nanjare heje o Filistinao reke, le natao iareo ty hamonoagne aze. Niroro ta Gaza tagne reke tie indraike, le linigne o Filistinao ambahavady eo ty hiakara’e mba hamonoa iareo aze naho maraindraigne. Niakatse ty Samsona naho fa tamy 12 halegne, le nombota’e i vavahadỳ sady nitarazoe’e an-tsoroke amparake ty niavia’e tamy ty vohitse marine i Hebrona.

Nandeha mbamy i Delila sipa i Samsona mbeo o Filistinao, le nirehake tie: ‘Homea’ay drala madineke volafotsy 5 500 rehe naho fanta’o ty anto’e mampatanjake i Samsona. Teà’ay ho tsepahegne reke mba hogadrae’ay.’ Te hahazo drala ty Delila le nagneke. Nagnontenea’e ty Samsona faie tsy nagnambara hey tamy ty voaloha’e. Tsy nadò i Delila reke naho tsy nirehake ty maregne. Le hoe reke: ‘Mbe lia’e naho nihitsifagne ty voloko toy fa Nazirita raho. Fa naho io ro hitsifagne, le tsy maozatse sasa raho.’ Hadisoam-bey hoahy i Samsona ty nirehake izay.

Nirehake tamo o Filistinao amy izay ty Delila tie: ‘Fantako ty mampatanjake aze.’ Nampiroroe’e tamy i fe’ey eo ty Samsona,  le nampanampahe’e ndaty i volo’ey. Nendrahe’e reke tie: ‘Intia i Filistina rey!’ Nitaitse ty Samsona faie tsy natanjake sasa. Tsinepa o Filistinao reke, le finoy iareo ty maso’e sady mbe ginadra iareo ka.

Nisy Filistina agnarivo’e tie indraike nivory tamy ty tempoly i Dagona, andrianagnahare iareo ao sady nikorakorake tie: ‘Nampea i Dagona tika le rese ty Samsona. Akaro reke fa hokizahentikagne.’ Natao iareo tagnivo ty poto roe eo reke sady natao iareo fikizahegne. Nivavake ty Samsona tie: ‘Omeo hery indraike raho Jehovah.’ Fa nitiry i volo’ey tamy izay. Natose’e mafe bey i poto rey, le nihomake i tragnoy. Nimate iaby ze Filistina tao sady mate ka reke.