Mbaiserael mbagenev kpishi yange ve va hide ve yem u civir mbaaôndo mbaaiev, nahan Yehova na ian ér Mbafiliti ve ngohol ve inya. Kpa Mbaiserael mbagenev yô, Yehova doo ve ishima. Oriserael ugen u un kpa Yehova doo un ishima yô, lu Manoa. Un vea kwase na cii yange ve lu a wan ga. Tsô iyange igen Yehova tindi ortyom na hen kwase u Manoa. Ortyom la za kaa a na ér: ‘U va mar wan u nomso. Una yima Mbaiserael sha ikyev i Mbafiliti. Una lu Ornasari.’ U fa ior mba yange i yilan ve ér Mbanasari la kpa? Lu uicighanmbaiorov mba eren Yehova tom. Yehova yange wa tindi ér Ornasari nana de hondon ityough ga.

Ken masejime yô, i mar Manoa wan u nomso, a ii un iti ér Semson. Semson we ikyondo yô, Yehova na un agee kpishi. Semson yange lu a agee je wua begha sha ave. Kwagen la, Semson wua Mbafiliti 30 un tswen. Nahan Mbafiliti kôr un ihyom je lu keren gbenda u wuan un. Kwagen la di, Semson lu yaven hen geri u Gaza tugh, maa ve di ve mough ve lu za keghen un sha gyeeti i nyôron ken geri shon, ér kper sev a aven yô, vea wua un. Kpa Semson va mough ken atôutu, za tsua gyeeti shon jimin cii sha kpekpe kera. A tôô i sha igyundu a yem a mi ica, a za unde a mi a ver sha ityough ki uwo ugen, ikyua a Heberon!

Shighe kar yô, utyombaiorov mba Mbafiliti cii mough za kohol Delila, kwase u Semson lu sôôr yô, ve kaa a na ér: ‘Aluer u mee u fa er i hii ve Semson a taver agee kpishi nahan yô, hanma wase nana na u agbenger a azurfa 1,100. Se soo u kôron un wuhen ken purusu.’ Delila yange soo ér ve na un inyaregh kira, nahan a lumun. Sha hiihii la, Semson venda u pasen un er i hii ve un taver agee kpishi yô. Kpa a zer zan Semson iyol gbem tsô va gande Semson ôr un. Semson kaa a na ér: ‘Aluer i hondom ityough yô, me kera lu a agee ga.’ Semson yange er kwagh u ibume kpishi, er ôr kwase la kwagh ne yô. U nenge wer yange er lu kwagh u ibume gaa?

Delila maa yem fese za kaa Mbafiliti ér: ‘M fa er i hii ve a taver agee  kpishi yô!’ Yange Delila er Semson yav un sha ikyum gba mnyam mem mem, maa a kaa orgen va hondo Semson ityough. Delila maa ngor ér: ‘Semson, Mbafiliti mba heen!’ Semson nderen yô, kera zua a agee ga. Mbafiliti maa kôr un, ongor un ashe, ve yem a na ve za kende ken purusu.

Iyange igen Mbafiliti udubu imôngo kohol ken tempel u Dagon, aôndo u ve civir yô, ve lu geren kaan ér: ‘Ngwa, aôndo wase kôr Semson na se ve! Due a Semson ken won! A er se akaa a hômon.’ Yange ve due a na ve va ver un tile hen atô u mtôm mhar, ma tempel la, ve lu lamen sha a na shi sen un. Semson maa er msen genger genger kaa ér: ‘Yehova, wea lumun yô, mase nan mo agee kwa ne tseegh.’ Nahan maa ice i Semson hide hii u menden. Semson maa za tuur mtôm ma tempel ma mhar mara sha agee a na cii. Maa you la jimin cii i yôhôr i haa inya, nahan ior mba yange ve lu ker la cii kpe, kua Semson kpaa.