Ase Isariyɛlɛ efula wakayɔtɛmɔlaka nto dikishi, ɔnkɔnɛ, Jehowa aketawɔ di’ase Filistiya mbahemɛ wodja awɔ. Koko ase Isariyɛlɛ amɔtshi wakokaka Jehowa ngandji wakikɔ. Ɔmɔtshi l’atei awɔ lokombo lande Manɔa. Nde la wadɛnde kombota. Lushi lɔmɔtshi Jehowa akatome ondjelo ɔmɔtshi le wadi aki Manɔa. Ondjelo akawotɛ ate: ‘Wɛ ayota ɔna pami. Nde ayoshimbɛ Isariyɛlɛ oma le ase Filistiya. Nde ayonga Okidiami.’ Onde wɛ mbeyaka waa na waki akidiami? Vɔ waki ekambi wa Jehowa wa laande. Ekidiami takawahombaka minya divo.

L’edjedja ka wonya, ɔna aki Manɔa akayotɔ, ko wakawɔlɛ Samisɔna. Etena kakole Samisɔna, Jehowa akawetɛ kanga wolo efula. Nde akakokaka ndjaka ntambwɛ la anya ande. Lo diaaso dimɔtshi, Samisɔna ndamɛ akadiake ase Filistiya 30. Ase Filistiya wakohetshaka ndo wakatetemala nyanga waaso wa mbodiaka. L’otsho ɔmɔtshi, etena kakalale Samisɔna la Ngaza, vɔ wakatshu la soko di’osomba ndo wakokongɛka lɛkɔ dia vɔ mbodiaka la pindju. Koko l’atei w’otsho, Samisɔna aketɔ akatshu la soko di’osomba ndo akahatola lokuke oma lo ehele. Nde akɛmbɛ lokuke lakɔ l’ahɛka ko akadɛ la lɔ polo la shɔdi ya dikona dimɔtshi diele suke la Hɛbɛrɔna!

L’ɔkɔngɔ diko, ase Filistiya wakatshu le Delila laki ɔngɛnyi wa Samisɔna wa womoto, ko wakawotɛ vate: ‘Tayokosha nunu di’ekenga wa mfɛsa naka wɛ mbeya kiɔkɔ ya wolo w’efula wele la Samisɔna. Sho nangaka mbonda ndo mbodja lo lokanu.’ Delila akalangaka falanga, ɔnkɔnɛ nde aketawɔ. L’etatelo, Samisɔna akatone dia mbotɛ lande na kende la wolo efula. Koko nde akawembiyɛka polo lo Samisɔna ndjowosholɛ sheke ya wolo ande. Samisɔna akawotɛ ate: ‘Divo diami hadionyɛmaka nɛ dia dimi lekɔ Okidiami. Naka vɔ minyɛmi divo, kete wolo ami wayoshila.’ Samisɔna akasale munga ka woke lo mbotɛ dui sɔ, shi mɛtɛ?

 Mbala kakɔ ɔtɔi Delila akatɛ ase Filistiya ɔnɛ: ‘Lambeya sheke ya wolo ande!’ Nde akaladia Samisɔna djɔ lo dihɛlɔ diande, ko akelɛ onto ɔmɔtshi dia ndjowonya divo. Delila akate la dui dia wolo ate: ‘Samisɔna, eenda ase Filistiya wamboya!’ Samisɔna aketɔ, ko aya bu la wolo. Ase Filistiya wakawonde, wakawole washo ko wakawodje lo lokanu.

Lushi lɔmɔtshi, nunu di’ase Filistiya wakasangana lo tɛmpɛlɔ ka jambizambi yawɔ Dangɔna wakate la dui dia wolo ɔnɛ: ‘Jambizambi yaso ambokimɔ Samisɔna l’anya aso! Nyotondja Samisɔna! Nyɛsɔ tosalake la nde shɛkɛsɛkɛ.’ Vɔ wakawemadia lam’asa dikundji dihende, ko wakawɔlaka. Samisɔna akelɛ la dui dia wolo ate: ‘Jehowa le, lam’alangayɛ ombisha wolo mbala kɛnɛ nto.’ L’etena kɛsɔ, ko divo dia Samisɔna diambola. Nde akatshindjiya dikundji dia tɛmpɛlɔ la wolo ande tshɛ. Luudu l’otondo lakanyukɔ, lakadiake anto tshɛ waki lo tɛmpɛlɔ ndo Samisɔna lawɔ akavu.