Ayisraele anandi angwamba so kusopa angoza. Mwaviyo, Yehova wanguzomereza kuti Afilisti alamuliyengi charu chawu. Kweni penga Ayisraele anyaki wo ayanjanga Yehova ndipu yumoza waki wenga Manowa. Iyu ndi muwolu waki ŵengavi mwana. Zuŵa linyaki Yehova wangutuma mungelu ku muwolu waku Manowa. Mungelu yo wangumukambiya kuti: ‘Wazamuja ndi mwana munthurumi. Iyu wazamutaska Ayisraele kwa Afilisti. Mwana yo wazamuja Munaziri.’ Kumbi uziŵa kuti Anaziri ŵenga ayani? Ŵenga ateŵeti apade aku Yehova. Anaziri azomerezekanga cha kusenga sisi lawu.

Pati pajumpha nyengu, Manowa ndi muwolu waki angubala mwana munthurumi ndipu angumudana kuti Samsoni. Wati wakuwa, Yehova wangumupasa nthazi. Samsoni wangubaya nkharamu ndi manja. Nyengu yinyaki, wangubaya Afilisti 30. Yiwu amutinkhanga ndipu apenjanga nthowa yakuti amubayiyi. Zuŵa linyaki Samsoni wanguluta ku Gaza ndipu wangugona kweniko. Ndi usiku, ŵanthu anguluta pageti la tawuni iyi ndipu angumulindiza kuti amubayi ndi mulenji. Kweni pakati pa usiku, Samsoni wanguyuka ndi kuluta pageti ndipu wangulijinthuwa. Iyu wangulipinga paphewa mpaka wanguchifika nalu pachanya pa phiri lo lenga kufupi ndi Hebroni.

Pavuli paki, Afilisti anguluta kwaku Delila yo wenga chibwezi chaku Samsoni ndipu angumukambiya kuti: ‘Tikupasengi ndalama za siliva masauzandi nganandi asani ungaziŵa vo vichitisa Samsoni kuti waje ndi nthazi zinandi viyo. Tikhumba kumuko ndi kumuŵika mujeri.’ Delila wanguzomera chifukwa chakuti wakhumbanga ndalama. Pakwamba Samsoni wangukana kumukambiya vo vamuchitisanga kuti wajengi ndi nthazi. Kweni Delila wangumuchichiza mpaka wangumusumuliya chisisi chaki. Samsoni wangumukambiya kuti, ‘Sisi langu likusengekapu cha chifukwa nde Munaziri. Asani angandisenga sisi, nthazi zangu zimalengi.’ Samsoni wangunanga ukongwa kukambiya Delila, asi viyo?

Delila wanguluta kuchikambiya Afilisti nyengu yeniyo kuti: ‘Ndachiziŵa chisisi chaki.’ Iyu wanguchitisa kuti Samsoni wagoni tulu pachipakatu chaki  ndipu wangukambiya munthu munyaki kuti wamusengi sisi. Delila wangudaniriza kuti: ‘Samsoni Afilisti ŵaza!’ Samsoni wati wayuka, wanguwona kuti nthazi zaki zamala. Afilisti angumuko, angumutolo masu ndipu angumuŵika mujeri.

Zuŵa linyaki, Afilisti masauzandi nganandi anguwungana munyumba yo asopiyangamu chiuta wawu Dagoni ndipu adanirizanga kuti: ‘Chiuta widu watipasa Samsoni! Kamutoni! Wazitisekesepu.’ Yiwu angumuŵika pakati pa vipilala viŵi ndipu angwamba kumunyoza. Samsoni wangudaniriza kuti: ‘Yehova, chondi ndipaseni nthazi kamoza pe.’ Kufika pa nyengu iyi, sisi laku Samsoni lingukuwa so. Iyu wangututuza vipilala va nyumba yo ndi nthazi zaki zosi. Nyumba yo yinguwa ndipu ŵanthu wosi wo ŵengamu angufwa. Samsoni nayu wangufwa.