Nokwakainda ciindi, bunji bwabana Israyeli bakatalika alimwi kukomba baleza bakubeja, aboobo Jehova wakazumizya ba Filisiti kuti kababeendelezya. Pele bana Israyeli bamwi bakali kumuyanda Jehova. Umwi akati kabo wakali Manowa. Walo amukaintu wakwe tiibakajisi bana. Bumwi buzuba Jehova wakatuma mungelo kumukaintu wa Manowa. Mungelo wakamwaambila kuti: ‘Uyooba amwana musankwa. Uyoofwutula bana Israyeli kuzwa kuba Filisiti. Uyooba mu Naziri.’ Sena ulibazyi aabo ibakali kwiitwa kuti ba Naziri? Bakali babelesi ba Jehova ibayandika kapati. Ba Naziri tiibakali kuzumizyigwa kugela masusu aabo.

Mukuya kwaciindi, mwana wa Manowa wakazyalwa akuulikwa zina lyakuti Samusoni. Ciindi Samusoni naakakomena, Jehova wakapa kuti abe anguzu kapati. Wakali kukonzya kujaya syuumbwa kubelesya buyo maanza aakwe. Aciindi cimwi, Samusoni wakajaya ba Filisiti ibali 30 alikke. Ba Filisiti tiibakali kumuyanda alimwi bakali kuyandaula nzila zyakuti bamujaye. Busiku bumwi, ciindi Samusoni naakali koona ku Gaza, bakaunka kumulyango wamunzi akulindila ookuya kutegwa bwaca bamujaye. Pele akati kamasiku, Samusoni wakabuka akuunka kumulyango wamunzi, mpoonya wakaugwisya mulyango kuzwa kubwaanda. Kumane wakaunyamuna amagwezyo aakwe mane kuyoosika atala aamulundu afwaafwi aku Hebroni!

Mukuya kwaciindi, ba Filisiti bakaunka kumusimbi wa Samusoni wazina lya Delila akwaamba kuti: ‘Tulakupa nsiliva izili 5,500 ikuti naa utwaambile ikaambo Samusoni ncali anguzu kapati. Tuyanda kumujata akumubikka muntolongo.’ Delila wakali kwaayandisya mali, aboobo wakazumina. Kumatalikilo, Samusoni wakakaka kumwaambila ikaambo ncaakali anguzu kapati. Pele Delila wakamoongelezya kusikila mane waayubununa makani. Wakamwaambila kuti, ‘Masusu aangu taanageledwe kuzwa kubwana nkaambo ndili mu Naziri. Ikuti masusu aangu agelwa, nguzu zyangu inga zyamana.’ Samusoni wakalubizya kapati kumwaambila makani aayo Delila, tee kayi?

 Cakufwambaana Delila wakaambila ba Filisiti kuti: ‘Ndacizyiba cipa kuti kali anguzu kapati!’ Mpoonya wakapa kuti Samusoni aone amaulu akwe, kumane wakaita muntu umwi kuti azoomugele masusu. Delila wakoongolola kuti: ‘Samusoni, ba Filisiti baboola!’ Samusoni wakabuka, pele nguzu zyakwe zyakamana. Ba Filisiti bakamujata, bakamudonkola meso, kumane bakamubikka muntolongo.

Bumwi buzuba, ba Filisiti banji kapati bakabungana mutempele lyaleza wabo Dagoni kaboongolola kuti: ‘Leza wesu watugwasya kuti tumujate Samusoni! Amumulete Samusoni anze! Atumusobanye.’ Bakamwiimikizya akati kamisemu yobilo, mpoonya bakatalika kumufwubaazya. Samusoni wakaita ajwi lyanguzu kuti: ‘O Jehova, kondipa nguzu alimwi ciindi comwe buyo.’ Aciindi eeci, masusu aa Samusoni akalilampide kale alimwi. Wakaitonka misemu yatempele anguzu zyakwe zyoonse. Tempele lyakawa, mpoonya bantu boonse ibakali mutempele oomo kubikkilizya a Samusoni bakafwa.