Oy ep j-israeletik ti lik yichʼik ta mukʼ yan velta li jecheʼ diosetike. Jaʼ yuʼun li Jeovae laj yakʼ ti akʼo xlajik ta ilbajinel yuʼun li jfilistaetike. Pe oy jlom j-israeletike chchʼunbeik smantal li Jeovae. Jech kʼuchaʼal li Manoae. Li Manoa xchiʼuk yajnile chʼabal yalabik. Pe jun kʼakʼal li Jeovae la stak tal jun yaj-anjel sventa xi chalbe li yajnil Manoae: «Ta xlik achiʼin avol, chavokʼes jun kerem. Jaʼ tskolta lokʼel ta skʼob jfilistaetik li achiʼiltak ta israelale. Jaʼ jun jnasareo chkʼot». ¿Mi xanaʼ buchʼu jaʼik li jnasareoetike? Jaʼik li buchʼutik tʼujbilik yuʼun Jeova sventa spasik jun abtelal ti toj tsots skʼoplale, jech xtok mu x-akʼbat slokʼ sjolik.

Ta mas jelavele vokʼ jun xnichʼon li Manoae. Sanson laj yakʼbeik sbi. Kʼalal chʼi xa ox talele, akʼbat tsots yip yuʼun li Jeovae, yuʼun xuʼ xmil yuʼun jkot leon ta skʼob noʼox. Jun veltae, ta stuk noʼox la smil 30 jfilistaetik. Jech oxal chopol tajek laj yilik li Sansone jaʼ yuʼun lik snopik kʼuxi xuʼ smilik. Jun akʼobal kʼalal yakal chvay te ta jteklum Gasa li Sansone, li yajkontratake te bat smalaik ta stiʼ jteklum sventa smilik kʼalal mi sakub osile. Pe li Sansone lik ta oʼlol akʼobal bat ta stiʼ jteklum sventa stʼol o spits lokʼel li stiʼe. Vaʼun la xkuch batel ta snekeb jaʼ to ti kʼot ta jun vits ti nopol xil Ebrone.

Ta tsʼakale bat kʼoponatuk yuʼun jfilistaetik li snovia Sanson ti jaʼ li Dalilae, xi albate: «Ti mi la anaʼ kʼu yuʼun toj tsots yip li Sansone, ta jtojotkutik 1,100 ta sep plata ta jujuntal. Yuʼun ta jkʼan ta jtsakutik xchiʼuk ta jtikʼkutik ta chukel». Ta skoj ti tskʼan takʼin li Dalilae la xchʼun. Vaʼun la sjakʼbe Sanson ti kʼu yuʼun toj tsots li yipe, ta slikebale mu toʼox skʼan xal, pe ta skoj ti te xvulvun-o li Dalilae, xi laj yalbee: «Jaʼ ta skoj ti muʼyuk buchʼu slokʼojbun-o li jole yuʼun jnasareoal vinikun, pe mi oy buchʼu tslokʼbune, muʼyuk xa kip chikom». Muʼyuk lek ti jech la spas li Sansone, ¿mi mu jechuk?

Kʼalal laj yaʼi li Dalilae la stak ta ikʼel li jfilistaetike, vaʼun xi laj yale:  «Li Sansone laj xa yalbun ta jamal ti kʼu yuʼun tsots yipe». Vaʼun li Dalilae laj yakʼ ti akʼo ochuk svayel li ta yoke xchiʼuk oy buchʼu laj yikʼ ochel sventa akʼo slokʼbe sjol li Sansone. Laje xi avan li Dalilae: «¡Sanson, tal xa stsakikot li filistaetike!». Kʼalaluk vikʼ sat li Sansone, laj yaʼi ti chʼabal xa yipe. Jaʼ yuʼun li jfilistaetike la xchukik batel, la spitsbeik li sbekʼ sate xchiʼuk la stikʼik ta chukel.

Jun kʼakʼal ta smilal xa noʼox jfilistaetik la stsob sbaik li ta templo yuʼun sdiosik ti Dagon sbie, xi tsots avanike: «¡Li dios kuʼuntike laj xa yakʼ ta jkʼobtik li Sansone, lokʼesik sventa jlabantik!». La xchukik ta olol chib syoyaltak li temploe, vaʼun xi tsots avan li Sansone: «¡Kajval Jeova!, ¡avokoluk akʼbun kip yan velta!». Kʼalal jech la skʼanbe li Jeovae chʼiem xa ox sjol yan velta li Sansone. Vaʼun tsots la xuj li syoyaltak temploe. Kʼalaluk jech la spase jin yalel skotol, te cham skotol li buchʼutik te tsobolike xchiʼuk te kapal cham ek li Sansone.