Damu nga Israelita an binalik na liwat ha pagsingba ha mga dios-dios, salit gintugotan ni Jehova nga kontrolon han mga Pilisteohanon an ira nasud. Pero may-ada pa mga Israelita nga nahigugma kan Jehova. Usa ha ira hi Manoa. Hiya ngan an iya asawa waray anak. Usa ka adlaw, nagsugo hi Jehova hin anghel ngadto ha asawa ni Manoa. An anghel nagsiring ha iya: ‘Magkakaada ka anak nga lalaki. Iya tatalwason an Israel tikang ha mga Pilisteohanon. Magigin Nasareo hiya.’ Maaram ka ba kon ano an mga Nasareo? Espesyal nga surugoon hira ni Jehova. Diri hira puydi magpaarot.

Pag-abot han panahon, natawo an anak ni Manoa, ngan gin-ngaranan niya an bata hin Samson. Pagdaku ni Samson, ginhimo hiya ni Jehova nga makusog gud. Kaya niya patayon an usa nga leon pinaagi la han iya mga kamot. Makausa, ginpatay niya an 30 nga Pilisteohanon nga hiya la. Nasina gud ha iya an mga Pilisteohanon ngan nagpinamiling hin paagi basi patayon hiya. Usa ka gab-i han nakaturog hi Samson ha Gasa, kumadto hira ha ganghaan han syudad ngan naghulat didto basi patayon hiya pagkaaga. Pero ha katutnga han gab-i, binuhat hi Samson, ngan ginrangka ha pader an purtahan han ganghaan han syudad. Katapos, ginpas-an niya ito tikadto ha pungkay han usa nga bukid hirani ha Hebron!

Waray pag-iha, kinadto an mga Pilisteohanon ha uyab ni Samson nga hi Delila, ngan nagsiring: ‘Babaydan ka namon hin yinukot nga silber kon mahibaroan mo kon kay ano nga makusog gud hi Samson. Karuyag namon hiya dakpon ngan prisuhon.’ Karuyag ni Delila makuha an kwarta, salit umuyon hiya. Ha siyahan, nadiri pagsumat hi Samson kon kay ano nga makusog gud hiya. Pero ginpinirit hiya ni Delila salit iginsumat niya an iya sekreto. ‘Waray pa gud ako aruti kay Nasareo ako,’ siring niya kan Delila. ‘Kon arotan ako, mawawara an akon kusog.’ Daku gud nga sayop nga iginsumat ito ni Samson ha iya, diri ba?

 Hi Delila nagsumat dayon ha mga Pilisteohanon: ‘Maaram na ako han iya sekreto!’ Ginpakaturog niya hi Samson ha iya paa, ngan may ginsugo hiya nga mag-arot kan Samson. Hi Delila gumuliat: ‘Samson, adi an mga Pilisteohanon!’ Nagmata hi Samson, pero nawara na an iya kusog. Gindakop hiya han mga Pilisteohanon, ginbuta, ngan ginpriso.

Usa ka adlaw, yinukot nga Pilisteohanon an nagtirirok ha templo han ira dios nga hi Dagon, ngan hira ginuliat: ‘Iginhatag ha aton han aton dios hi Samson! Igawas hiya! Himoon ta hiya nga pataraw-an.’ Ginpatindog nira hiya ha butnga han duha nga harigi ngan gintinamay. Hi Samson nagsinggit: ‘O Jehova, nakikimalooy ako, tagi ako utro hin kusog.’ Hito nga panahon, humilaba na utro an buhok ni Samson. Ginduso niya an mga harigi han templo ha bug-os niya nga kusog. Narumpag an templo, ngan namatay an ngatanan nga tawo didto pati hi Samson.