Israelita maro be nimpody nanompo sampy ndraiky, ke nambelany Jehovah Filistiny aby io hanjaka tamy tanindro. Fa sasany tamindro Israelita aby io ndraiky mbala nanompo Jehovah. An̈isanizen̈y Manoa. Tsy niteraka iro roeny vadiny. Tandraraiky, Jehovah nandefa anjely tamy vadiny Manoa. Anjely io nivolan̈a: ‘Anao hiteraka tsaiky lelahy, ke izy han̈avotro Israelita amy Filistiny aby io. Izy ho Nazirita.’ Hainao ma olo karakory Nazirita zen̈y? Iro io olo man̈ano fanompoan̈a manokana niny Jehovah. Baka io iro tsy mahazo manapaka fan̈eva.

Teraka amy zay tsiaky io, ke Samsona natao an̈aranany. Nataony Jehovah fatatra mare izy koa fa be. Izy nahavita namono lion tamy tan̈anany fo. Nahafaty Filistiny 30 koa izy. Iro Filistiny aby io tsy tia Samsona mare, ke iro mila hamono izy. Nisy fotoan̈a izy nandry ta Gaza, ke nambesandro Filistiny aby io tamy barony tanàna io izy, misy hamonoandro izy lera andra kiaka. Kanefa, koa fa sasakalin̈y, nifoha Samsona. Izy nandeha tamy baro tarỳ, nimbontany tan̈y tomboko baro io, ndreky nindesiny tambelan̈a tanàna. Nilanjainy raha io firaka izy navy narikitry tampony bongo Hebrona.

Nisy man̈angy zay niarasany Samsona, Delila an̈arany. Iro Filistiny aby io nivolan̈a taminany: ‘Anao hamianay vola madiniky volafotsy 5 500, izikoa ambaranao zahay ino raha mahavy Samsona fatatra be karaha io. Zahay mila han̈agadra izy.’ Tihahazo vola io Delila, ke izy nan̈eky. Tsy nambarany Samsona izy raha io tamy voanalohany, fa tsy nety nambelany Delila izy. Nafosany Samsona foeky raha io. Hoizy: ‘Zaho tsiary nanapaka fan̈eva fotony zaho Nazirita. Izikoa tapahan̈a fan̈evanaka ty, zaho manjary tsy fatatra eky.’ Tsy nety foeky raha nataony Samsona zen̈y!

 Koa fa hainy Delila raha zen̈y, karaha ty nivolan̈iny tamy Filistiny aby io: ‘Haiko eky sekrenany!’ Nampandriany tampofoan̈anany Samsona, baka io nirahiny nitapahinolo fan̈evanany. Delila amy zay nivolan̈a: ‘Samsona, iro Filistiny aby io navy e!’ Samsona koa fa nifoha in̈y, izy fa tsy fatatra eky. Nisamborindro Filistiny aby io izy, nipotserindro masonany, baka io izy nigadraindro.

Tandraraiky, maro be Filistiny nivory tamy tempoliny Dagona, izio zan̈aharindro. Iro nandronton̈o mare: ‘Atsika nampiany zan̈aharintsika, ke nazontsika eky Samsona! Aboaha atỳ izy, ataontsika raha fimoezan̈a.’ Nataondro tan̈elan̈elan̈a poto aroe izy tao, sady nitokizandro. Samsona nivolan̈a: ‘A Jehovah e, ataova matanjaka ndraiky zaho.’ Efa naniry fan̈evanany taminio. Naposiny Samsona taminy angovonany jiaby potony tempoly io. Rongana tan̈y tempoly io, ke olo jiaby tao naty aby; Samsona koa mba naty.