Ayisalayeli ŵajinji ŵatanditesoni kulambila milungu jine. M’yoyo Yehofa ŵakundile kuti Afilisiti ŵalamulileje. Nambo paliji Ayisalayeli ŵane ŵaŵamnonyelaga Yehofa. Jumo mwa jemanjaji jwaliji Manowa. Jwalakwe yalumo ni ŵamkwakwe nganakola ŵanace. Lisiku line Yehofa ŵatumisye lilayika kwa ŵamkwakwe Manowa. Lilayikalyo lyatite kwa jwalakwe, ‘Cimcikola mwanace, jucacikulupusya Ayisalayeli m’miyala mwa Afilisiti. Jwalakwe caciŵa Mnasili.’ Ana mkwamanyilila Anasili? Jemanjaji ŵaliji ŵandu ŵaŵatumicilaga Yehofa mwapajika. Anasili nganiŵakundaga kusenga umbo syawo.

Mwangakaŵa Manowa jwakwete mwanace jwamlume ni ŵamkolasile kuti Samusoni. Mwanaceju ali akusile, Yehofa ŵampele macili gejinji. Jwalakwe ŵawuleje lisimba mwangakamulicisya masengo cida cilicose. Ndaŵi jine, jwalakwe jwawuleje jika Afilisiti ŵakwana 30. M’yoyo Afilisitiwo ŵam’ŵengaga ni ŵasosaga matala gakum’wulajila. Lisiku line cilo, Samusoni paŵaliji mlugono ku Gaza, Afilisiti ŵapite ku geti ja mumsinda ni kumlindililaga kuti am’wulaje kundaŵi kwakwe. Nambo sikati ja cilo, Samusoni jwajimwice ni jwajawile ku geti ja mumsindamo ni gumulanya getijo. Jwalakwe jwanyakwile getijo pekoyo ni kwawula najo penani pa litumbi lyalyaliji ciŵandika Hebuloni.

Kaneko Afilisitiwo ŵapite kwa uganja wa Samusoni wawaliji Delila ni ŵaŵusalile kuti, ‘Citumpe masawusande ga mbiya sya silifa naga mkuwungunya kwakukusatyocela macili ga Samusoni. Tukusaka kumkamula kuti tumtaŵe.’ M’yoyo Delila pakusaka mbiyasyo jwakundile. Pandanda Samusoni jwakanile kumsalila ligongo lyakwe jwaliji jwamacili camti m’yoyo. Nambo jwamkongwejo jwajendelecele kumnyenjelela mpaka Samusoni jwasasile. M’yoyo Samusoni jwatite, ‘Nganisenjeje umbo syangu citandile ligongo ndili Mnasili. Ali asenjile umbosi, une ngaŵa mkolasoni macili.’ Pelepatu Samusoni jwalemwisye mnope kumsalila jwamkongwejo yeleyi. Ngati m’yoyo?

 Mwangakaŵa Delila ŵasalile Afilisiti kuti, ‘Ngumanyilila mtemela wakwe!’ Jwalakwe ŵamgonesye lugono Samusoni pacilolo. Kaneko jwalakwe jwam’ŵendile mundu jwine kuti amsenje umbo syakwe. Kaneko Delila ŵagumisile kuti, ‘Samusoni! Afilisiti ayice!’ Samusoni jwajimwice ali jwangali macili. Afilisiti ŵamkamwile ni kumtusula meso ni ŵam’ŵisile mu ukayidi.

Lisiku line Afilisiti ŵajinji ŵasongene m’nyumba jakupopelela ja mlungu jwawo Dagoni. Ni ŵagumisile kuti, ‘Mlungu jwetu atupele Samusoni! Amkoposye Samusoni kuti atusangalasyeje.’ Ni ŵamjimice pasikati panjanamila siŵili nikutanda kumlagasya. Samusoni ŵagumisile kwa Yehofa kuti, ‘Yehofa, ambesoni macili kamo basi.’ Pandaŵiji umbo syakwe syaliji sili sikusilesoni. Jwalakwe jwatutile njanamilasyo ni macili gakwe gosope. M’yoyo cinyumba cosopeco cagwile ni ŵandu wosope ŵaŵaliji mwelemo ŵawile. Nombe najo Samusoni jwawile.