Badungu aYisaraere aima karagatiyo berewe kaa irisokpiahe, sidu, Yekova ambugene fu aFereseto i du na pagbia kurii gayo ringara. Ono kura bete aYisaraere adu kinaho naima kpinyemu Yekova. Boro sa dagba agu aboro re angia Manoa. Agude aadunga beyo na diako te. Rogo kura uru sa, Yekova akedi Maraika koyo du dia Manoa ni. Maraika aya furi wẽ: ‘Mo nika vunga gude. Ko nika batasa aYisaraere be aFereseto. Ko adu ni boro Nazara.’ Ya mo mo iningo gini ngbatunga aboro nangia aboro Nazara? I angia ga Yekova kparakpara amoyambu. Aboro Nazara anaakpenga riyo te.

Fuo bete regbo kusa, i avungu wiri Manoa, ko ki yambu rimoko nga Samusona. Ho Samusona asona ni, Yekova afu bakere ome fuko gbe. Ko arengbe ka imo bahu na kina kungbo beko gbua. Ti kura regbo sa, Samusona aimi aFereseto 30 nisako. AFereseto aima soga ko na i kini gbata agene tipa ka imoko. Rogo kura yuru sa ho Samusona aara ni rogo gu gbata nga Gaza, i andu ku ngbadimo bakporo yo kaa sungudo ko yo wa ka i rengbe ka imoko wiso. Ono bebere yuru, Samusona andu ku ngbadimo bakporo yo, ki mo ngbadimo bakporo kusayo ti vuro ndugu. Ko atindi gu ngbadimo bakporo re pagoko ki ndu na ni ki da kina boro kurii gu bagangara naadu mbembedi na Eburone!

Kusa, aFereseto andu fuo gu dee Samusona adu na pabakure na ri nangia Derira, ki ya furi: ‘Ani nika fu akutu afeda foro ka mo ini gupai nasa Samusona ko du na bakere ome. Ani naida ka zio ko ka bako ku bambukiso yo.’ Derira aaida na marã, sidu, ri ki idihe. Ti tonatonaha Samusona aima ká ka gumbapa gupai furi naasa ko ko du na bakere ome. Ono ri asosodi ko da kinaho ko akusipa gako birĩ ni furi. ‘Ko aya furi wẽ, i aakpenga rire mbata te mbiko boro Nazara nga mi.’ ‘Ka i kpe rire, ome adunga tire berewe te.’ Samusona aima inga ni kerehe ho ko ape gupai re ni furi, nga wo te?

 Nibasa, Derira apehe fu aFereseto ki ya: ‘Mi ima ino gako birĩ!’ Ri asa Samusona rame ziko kurii nduri, fuoho, ri ki ye na boro ni kpe riko. Derira kita ngbari ki ya: ‘Samusona aFereseto ima da!’ Samusona azingi rame yo, ka gako ome adunga berewe tiko ya. AFereseto aziko, ki kofo abangiri ko na ki moi ko ku bambukiso yo.

Rogo kura uru sa, akutu aFereseto adunguratiyo ku rogo gu yekaru nangia ga gu gayo mbori nga Dagona, ki ni tangbayo ki niya: ‘Gaani mbori ima fu Samusona ku berani! Oni kusi Samusona ku zegi no! Ani ngimbaro na ko.’ I arugusi ko dagba kikindigi angua bambu ue na kini sawia ko. Samusona ki kpari kuari ki ya: ‘Ako Yekova mi nazungodi ro mo funga ome fere bara sa berewe.’ Ti gu regbo re, mange rii Samusona aima funo berewe kubaha. Ko ki turã kikindigi angua bambu nga ga yekaru na omeko dũ. Bambu naabaha ki gburuwa, ki imi aboro dunduko yekaru yo, Samusona ki kpi a tigako.