Xidal israelitas bienyibu dioxh falz stoib, por ngú Jehová biduidy lagary que filisteos ñony mandary layibu. Per goyoʼ tipnés israelitas ni buny ni ná Jehová, xomod toib buñguieeu ni góc laa Manóah. Láabu né tzeelbu diti goyoʼ xiinyibu. Toibtica dzú Jehová bixelbu toib ángel ronoʼ tzeʼel Manóah. Ángelcu góoch láabu: «Sioʼ toib xiinlo. Láabu salaabu Israel ladxña filisteos. Sacbu toib nazareo». ¿Nanlo xí ngú toib nazareo la? Layibu goyodieʼyibu ló xchiin Jehová né diti bigaa guitzguicyibu.

Después gool xiin Manóah, né goleʼyibu laa badaʼcu Sansón. Órni goniʼs Sansón, Jehová biduidy xiroʼ galnadip láabu dada bigaitybu toib betz né ñasibu. Toibtica dzú, bigaitybu 30 filisteos. Nigolú bianladx buñ filisteos láabu, dada biyopyibu mod nagaityibu Sansón. Toibtica goxin laʼga Sansón natiasy lainy gudx Gaza, xi enemigbu golés láabu roʼ xpuert gudxcú par nagaity láabu. Per galagueʼelcu Sansón biás né bichoʼbu xpuert gudxcú, né bieʼbu láani né cuábu dainy dada bixopbu guic toib dainy gahxca Hebrón.

Después filisteos goyguen xinoby Sansón ni góc laa Dalila, né gochyibu gonaʼcu: «Saduidydo 5.500 nilas de plata looy pal rayopylo mod ganlo xigony nigolú nadip Sansón. Nainy guinásdo né guisaldo láabu press». Dalila goniiny nacaʼ bidxiichcu, por ngú gosaguelbu. Primer Sansón diti gosaguel naset xigony nigolú nadipbu portín gonbu que diti non ñonybu láani. Per Dalila nigolú goyoʼ loguiaʼbu né Sansón bixacladx né biset. Sansón goniʼ: «Dipa ma bigaa guitzguica portín naca nazareo, pal ragaa guitzguica ma diti sapa galnadip». Sansón bichébu órni gochbu Dalila xigony nigolú nadipbu, ¿scú ja?

Órcuca Dalila gooygudx filisteos: «¡Ma naana xigony nadipbu!». Dalila bistiasy Sansón ló ñeʼ. Né gonabbu toib buñ nagaa guitzguic Sansón. Ór cú Dalila bicaʼ rudx: «¡Sansón,  filisteos noʼ reʼ!». Sansón nimaca biás per biduidybu cuent que ma diti nadipbu. Filisteos gonás láabu, gohx bisalóbu né goloʼ láabu press.

Toibtica dzú xidalguixo filisteos bidopyibu lainy templo par guienyibu xtioxhyibu ni góc laa Dagón. Né bicaʼyibu rudx: «¡Xtioxhno bunycuent Sansón lóono! Colguitné Sansón reʼ par guixiichno láabu». Bisagaʼyibu Sansón galay chop pilary, né gosaló bixiichyibu Sansón. Sansón bicaʼ rudx: «Jehová, ranába looy biduidy galnadip naʼ stoib». Par ló dzúcu guitzguic Sansón ma bigaʼni stoib. Ór cú bichupiaʼbu pilary ni nap templocu né láani biabni né bigaityni guirá buñ. Sansón láaca goity ór cú.