Yehowa hla kojoli konɛ a hyɛ Israel ma a nɔ. Se Israel bi ɔmɛ suɔ nɛ a ná matsɛ mohu. A de Samuɛl ke: ‘Ma amɛ tsuo nɛ bɔle wɔ ɔ ngɛ matsɛmɛ. Wɔ hu wa suɔ nɛ wa ná matsɛ.’ Samuɛl bua jɔɛ nɔ́ nɛ a de ɔ he, lɔ ɔ he ɔ, e sɔle nɛ e de Yehowa. Yehowa de lɛ ke: ‘Pi mo nɛ a kua. Imi mohu nɛ a kua. Mo de mɛ ke a ma nyɛ ma ná matsɛ mohu lɛɛ, se matsɛ ɔ ma bi níhi fuu kɛ je a dɛ.’ Se ni ɔmɛ de ke: ‘Pi wa kɔmɔ. Wa hia matsɛ!’

Yehowa de Samuɛl ke nyumu ko nɛ a tsɛɛ lɛ ke Sɔɔl lɛ maa pee kekleekle matsɛ ɔ nɛ. Benɛ Sɔɔl ya slaa Samuɛl ngɛ Rama a, Samuɛl ngɔ nu kɛ pue Sɔɔl yi mi. Lɔ ɔ tsɔɔ kaa a pɔ Sɔɔl nu kaa matsɛ.

Pee se ɔ, Samuɛl tsɛ Israel ma a tsuo konɛ e ngɔ a matsɛ ehe ɔ kɛ tsɔɔ mɛ. Se benɛ a ngɛ Sɔɔl hlae ɔ, a nɛ lɛ. O le nɔ́ he je lo? E ya laa ngɛ ní komɛ a kpɛ. Benɛ a na Sɔɔl ɔ, a ngɔ lɛ kɛ ba da ni ɔmɛ a kpɛti. Sɔɔl ka pe nɔ fɛɛ nɔ ngɛ lejɛ ɔ, nɛ e he ngɛ fɛu saminya. Samuɛl de mɛ ke: ‘Nɔ nɛ Yehowa hla ji nɛ ɔ nɛ.’ Ma a tsuo pee kake kɛ de ke: ‘Matsɛ ɔ se nɛ kɛ ngɛ je mi!’

Sisije ɔ, Matsɛ Sɔɔl buɔ Samuɛl tue, nɛ e kɛ Yehowa blɔ tsɔɔmi hu tsuɔ ní. Se pee se ɔ, e tsake kulaa. Kaa nɔ hyɛmi nɔ́ ɔ, matsɛ be he blɔ nɛ lɛ nitsɛ e sãa afɔle. Ligbi ko ɔ, Samuɛl de Sɔɔl ke e mlɛ lɛ nɛ e ba konɛ e ba sã afɔle. Se Samuɛl ya sui lejɛ ɔ mla. Lɔ ɔ he ɔ, Sɔɔl nitsɛ ya sã afɔle ɔ. Kɛ Samuɛl pee e ní ha kɛɛ? E de Sɔɔl ke: ‘E sɛ nɛ o ko gbo Yehowa tue.’ Anɛ Sɔɔl kase nɔ́ ko ngɛ nɔ́ nɛ e pee ɔ mi lo?

Pee se ɔ, benɛ Sɔɔl kɛ Amalɛk bi ɔmɛ yaa hwu ta a, Samuɛl de lɛ ke e kpata mɛ tsuo a hɛ mi. Se Sɔɔl kpataa we Matsɛ Agag hɛ mi. Yehowa de Samuɛl ke: ‘Sɔɔl kua mi, nɛ e bui mi tue.’ Nɔ́ nɛ Sɔɔl pee ɔ dɔ Samuɛl wawɛɛ. Lɔ ɔ he ɔ, e de Sɔɔl ke: ‘Akɛnɛ o bui Yehowa tue hu he je ɔ, Yehowa maa hla matsɛ kpa.’ Benɛ  Samuɛl plɛ e he nɛ e yaa a, Sɔɔl nu e tade ɔ, nɛ e tade ɔ nya gba. Kɛkɛ nɛ Samuɛl de Sɔɔl ke: ‘Yehowa ma ha nɛ matsɛ yemi ɔ maa je o dɛ kaa bɔ nɛ tade ɔ gba a.’ Yehowa maa ngɔ matsɛ yemi ɔ kɛ ha nɔ ko nɛ e suɔ Yehowa, nɛ e buɔ lɛ tue.