Dilehon Jahowa do panguhum tu halak Israel laho mamimpin nasida. Alai didok nasida do muse tu si Samuel, ‘Sude bangso di luat on, adong do rajana. Hami pe ingkon adong ma rajanami.’ Didok roha ni si Samuel, sala do i. Martangiang ma ibana tu Jahowa. Alai didok Jahowa ma, ‘Ndang ho na ditolak nasida, Ahu do. Paboa ma tu nasida molo adong raja nasida, godang do na dipangido sian nasida.’ Nang pe songon i, didok bangso i do, ‘Ndang pola boha i, asal ma adong rajanami!’

Didok Jahowa ma tu si Samuel asa dipillit si Saul gabe raja na parjolo di Israel. Tingki ro si Saul manjumpangi si Samuel di Rama, diusehon si Samuel ma miak tu uluna, tanda naung dipillit ibana gabe  raja.

Di ari na mangihut, dijou si Samuel ma halak Israel laho patuduhon raja ni nasida. Alai martabuni do si Saul. Dilului ma si Saul jala diboan tu tonga-tonga ni bangso i. Ganteng do si Saul jala timbo, umtimbo do ibana sian manang ise pe. Didok si Samuel ma, ‘Ibana ma na dipillit Jahowa.’ Dung i didok bangso i ma gogo, ‘Horas ma di raja i!’

Di mulana, ditangihon raja Saul do si Samuel jala unduk tu Jahowa. Alai muba do ibana. Di sada tingki, nunga didok si Samuel asa dipaima si Saul ibana. Alai ala ndang ro dope si Samuel, gabe dilehon si Saul ma persembahan. Hape sasintongna holan malim do na boi mangalehon persembahan. Songon dia do si Samuel mangida i? Didok si Samuel ma tu si Saul, ‘Boasa ndang dioloi ho Patik ni Jahowa?’ Olo do si Saul muba?

Di tingki na asing, laho ma si Saul marporang mangalo bangso Amalek. Nunga didok si Samuel ingkon dibunu do sude na di huta i. Alai ndang dibunu si Saul Raja Agag. Didok Jahowa ma tu si Samuel, ‘Ndang ditangihon si Saul be Ahu.’ Lungun do roha ni si Samuel jala didok ma tu si Saul, ‘Ala ndang dioloi ho be Jahowa, dipillit Ibana  nama raja na asing.’ Tingki naeng laho si Samuel, ditarik si Saul ma baju ni si Samuel sampe maribak. Didok si Samuel ma muse tu si Saul, ‘Buaton ni Jahowa ma harajaon i sian ho.’ Dilehon Jahowa ma harajaon i tu halak na mangkaholongi jala na unduk tu Ibana.