Yahwe inankow hakim sya fa sfarkin er Israel. Ḇape, simarisen sakna raja. Sikofen ḇe Samuel i, ’Er ḇesesya sna raja. Nkomarisen nkakna raja kako.’ Samuel kyara inema roi ḇesasar nairi, inja ḇyenadi ḇe Yahwe I. Yahwe ikofen yoḇ i, ’Kawasa ansi spampum au ḇa, mboi spampum Aya. Wakofenḇair ḇe si na sakna raja, ḇape raja ani nari dor roi nabor ro si.’ Rarirya ido, sifandun ḇa ma simarisen pdef fa sna raja.

Yahwe ikofenḇair ḇe Samuel snon oso snori Saul nari ḇye raja Israel ḇerandak ya. Fafisu Saul isrow Samuel ro Rama, Samuel isḇawer mani ro bruri fa ḇyukirem i ḇe raja.

Ramnai, Samuel iwan snonkaku Israel sya fa sifanjur infa fyasnaḇair raja sedi. Ḇape, Saul isya ro dia ḇa. Wafawi ke ryo ro? Iyokef mankundi ro roieḇorna swafya. Rofyor sisrow Saul i, sun i ma siwan i fa dores ro fanandu kawasa ansi. Saul ima ikaki syadi ro snonkaku ansikam ma idoser kaku. Samuel ikofen ḇo doḇe, ’Ine iso snonkaku Yahwe kyinfir i kwar.’ Fafisu snonkaku ansi smam raja sedi, siryaḇ kaku.

Randak ya, Raja Saul ryower faro Samuel ma isouser Yahwe. Ḇape, ḇarpur ya isouser werḇa. Imnis raris, kakuya Saul ipok fa fyarser farsarser ḇa. Samuel iwan Saul i kwar fa iwaf isof ro ryama. Ḇape snaro Samuel ryama ḇaime, Saul fyarser farsarser anya ro mankundi. Moḇsa Samuel myam i rai? Ikofen ḇe i ḇo doḇe, ’Fandun fa wasouser faro Yahwe I.’ Saul imbror ro sasar ḇyenane ke?

Ras oso, fafisu Saul imbe myun snonkaku Amalek sya, Samuel ikofen ḇe i insa myunpres sikam. Ḇape, Saul myun raja Amalek, Agag i ḇa. Yahwe ikofen ḇe Samuel, ’Saul isouser werḇa, ma imewer ryower ayandi.’ Samuel ḇyesneso kaku,  ma ikofen ḇe Saul, ’Snar wamewer wasouser ḇe Yahwe I, nari kyinfir raja ḇebabo.’ Rofyor Samuel imbe rya, Saul damkepen ro Samuel syatu ḇyedi pusyom ya rawo imuk. Mura Samuel ikofen faro Saul, ’Yahwe na ifrur karajan bedi imuk ma duni bur au.’ Yahwe nari ḇyuk karajan ani ḇe snonkaku ḇeswar ma ḇesouser faro I.