Nggo ibereken Jahwe hakim-hakim si ngelindungi kalak Israel, tapi ipindo kalak e sekalak raja. Nina kalak e man Samuel, ‘Kerina bangsa-bangsa si deban lit rajana. Kami pe merhat lit raja kami.’ Menurut Samuel, pemindon kalak enda salah, emaka itotokenna man Jahwe. Nina Jahwe man Samuel, ‘Labo kam si itulak kalak e, tapi Aku. Kataken man kalak e, pasti mesera kegeluhenna adi sekalak raja si erkuasa nandangi ia.’ Tapi nina kalak e, ‘Labo dalih! Si penting lit raja kami!’

Ikataken Jahwe man Samuel maka raja pertama si ipilihNa e gelarna Saul. Sanga reh Saul ndahi Samuel i Rama, itangkuhken Samuel me si Saul jadi raja alu namaken minak ku takalna.

Idilo Samuel kalak Israel gelah ras-ras ngenen raja si mbaru e. Tapi la idah kalak e i ja Saul. Tehndu engkai? Perban Saul cebuni i pudi barang-barang. Kenca idat kalak e Saul, ibabana ia ku tengah-tengah jelma si nterem e. Daging Saul gedangen asangken kalak si deban, janah mejile kel rupana. Emaka nina Samuel, ‘Enda me kalak si ipilih Jahwe.’ Nina jelma si nterem e, ‘Mejuah-juahlah raja e!’

Tangtangna, Saul sekalak raja si nggit megiken Samuel ras patuh man Jahwe. Tapi dungna ia berubah. Contohna, labo raja si erdahin guna mereken persembahen. Bas sada wari isuruh Samuel si Saul nimai ia gelah erban persembahen. Tapi ndekah kel Samuel reh. Emaka lanai itimai Saul ia, dungna, ipersembahkenna sisada. Uga nina Samuel? Nina man Saul, ‘Engkai maka la kam patuh man Jahwe.’ Nggit nge Saul erlajar arah kesalahenna?

Kenca si e, sanga Saul lawes erperang ras kalak Amalek, isuruh Samuel gelah ibunuh Saul kerina kalak e. Tapi, Raja Agag la ibunuh Saul. Emaka nina Jahwe man Samuel, ‘Saul nggo nadingken Aku, lanai begikenna Aku.’ Ceda kel ukur Samuel, emaka nina man Saul, ‘Perban lanai ipatuhindu Jahwe, ipilihNa atena raja si deban.’ Sanga lawes ate Samuel, ihalangi Saul ia janah itarikna uis Samuel seh ngasa merigat. Kenca e, nina Samuel man Saul, ‘Nggo ibuat Jahwe kerajan enda i bas kam nari.’ Ibereken Jahwe ateNa kerajan e ku kalak si keleng ras si patuh man Ia.