Gihatagan ni Jehova ang mga Israelinhon ug mga maghuhukom aron giyahan sila, pero hari ang gusto nila. Miingon sila kang Samuel: ‘Ang tanang nasod sa palibot dunay hari. Gusto pod namog hari.’ Para kang Samuel sayop ang ilang gipangayo, busa miampo siya kang Jehova. Si Jehova miingon: ‘Ako ang ilang gisalikway, dili ikaw. Sultihi sila nga hatagan nako silag hari, pero lisodlisoron sila sa ilang hari.’ Bisan pa niana, ang mga tawo miingon: ‘Bahala na, basta gusto mig hari!’

Giingnan ni Jehova si Samuel nga si Saul ang mahimong unang hari. Dihang mibisita si Saul kang Samuel sa Rama, gibuboan ni Samuel ug lana ang ulo ni Saul ingong ilhanan nga siya na ang hari.

Dayon gipatawag ni Samuel ang mga Israelinhon aron ipailaila kanila ang ilang bag-ong hari. Pero wala nila makita si Saul. Kabalo ka ngano? Kay mitago siya sa mga bagahe. Dihang nakit-an na nila si Saul, ila siyang gikuha ug gipatindog taliwala sa katawhan. Si Saul ang kinatas-ang tawo didto, ug guwapo kaayo siya. Si Samuel miingon: ‘Siya ang gipili ni Jehova.’ Ang katawhan naninggit: ‘Mabuhi ang hari!’

Sa primero, namati si Haring Saul kang Samuel ug mituman kang Jehova. Pero nausab siya. Pananglitan, dili puwedeng magtanyag ug mga halad si Saul. Kas-a, giingnan ni Samuel si Saul nga hulaton siya, pero wala dayon makaabot si Samuel. Busa si Saul maoy naghalad. Unsay reaksiyon ni Samuel? Siya miingon: ‘Gituman unta nimo si Jehova.’ Nagmatinumanon na ba si Saul human siya badlonga?

Sa ulahi, dihang nakiggubat si Saul sa mga Amalekanhon, giingnan siya ni Samuel nga patyon silang tanan. Pero wala patya ni Saul si Haring Agag. Busa si Jehova miingon kang Samuel: ‘Si Saul wala na mosunod nako.’ Naguol kaayo si Samuel, ug iyang giingnan si Saul: ‘Kay wala na ka mosunod kang Jehova, magpili siyag laing hari.’  Dihang molakaw na unta si Samuel, gihawiran siya ni Saul maong nagisi ang sidsid sa iyang sinina. Dayon si Samuel miingon: ‘Mao sab kini ang mahitabo nimo. Kuhaon ni Jehova ang gingharian gikan kanimo.’ Ihatag ni Jehova ang gingharian ngadto sa tawong nahigugma ug motuman kaniya.