Jehova ye kititigɛlaw sigi Israɛldenw kun na u k’u ɲɛminɛ. Nka, Israɛldenw tun be masacɛ lo fɛ. U y’a fɔ Samuyɛli ye ko: ‘Jamana minw bɛɛ b’an gɛrɛfɛ, u bɛɛ be ni masacɛw ye. An fana be dɔ fɛ.’ Samuyɛli y’o jati kojugu ye. O kama a ye Jehova deli o koo la. Jehova y’a fɔ a ye ko: ‘Jama nin tɛ banna ele lo la dɛ, u be banna ne lo la. A fɔ u ye ko u be se ka masacɛ sɔrɔ. Nka, o masacɛ bena fɛɛn caaman ɲini u fɛ.’ O bɛɛ n’a ta, jama ko: ‘Basi t’o la. An be masacɛ lo fɛ dɔrɔn!’

Jehova y’a fɔ Samuyɛli ye ko cɛɛ dɔ lo bena kɛ u ka masacɛ fɔlɔ ye. A tɔgɔ ko Sayuli. Tuma min na Sayuli tagara bɔ Samuyɛli ye Rama, Samuyɛli ye tulu bɔn a kuun na, k’a mɔ k’a kɛ masacɛ ye.

Kɔfɛ, Samuyɛli ye Israɛldenw bɛɛ lajɛn k’u ka masacɛ kura yira u la. Nka, u ye Sayuli yaala ka dɛsɛ. I b’a lɔn fɛɛn min kama wa? A tun dogora minanw cɛma. U nana Sayuli ye tuma min na, u y’a minɛ ka taga n’a ye jama cɛma. Sayuli tun ka jan n’u bɛɛ ye ani a tun cɛ ka ɲi kosɔbɛ. Samuyɛli ko: ‘Jehova ye mɔgɔ min sugandi, ale lo ye nin ye.’ Jama pɛrɛnna ko: ‘Masacɛ ka sii sɔrɔ!’

A daminɛ na, masacɛ Sayuli tun be mɛnni kɛ Samuyɛli fɛ ani a tun be Jehova sago kɛ. Nka kɔfɛ, a y’a sɔɔn yɛlɛma. Ɲɛyirali fɛ, masacɛ tun man kan ka saraka bɔ. Loon dɔ la, Samuyɛli tun y’a fɔ Sayuli ye ko a k’ale kɔnɔ a be na, nka Samuyɛli ma na joona. O kama, Sayuli y’a latigɛ ka saraka bɔ a yɛrɛ ma. Samuyɛli ye mun lo kɛ do? A y’a fɔ Sayuli ye ko: ‘I tun man kan ka Jehova kaan bila.’ Yala o koo y’a to Sayuli ye hakili sɔrɔ wa?

Kɔfɛ, Sayuli tagara Amalɛkiw kɛlɛ. Samuyɛli y’a fɔ a ye a kana mɔgɔ si to niin na. Nka Sayuli y’a latigɛ ka masacɛ Agagi to yen, a m’a faga. Jehova y’a fɔ Samuyɛli ye ko: ‘Sayuli bɔra ne kɔ, a ma mɛnni kɛ ne fɛ.’ Samuyɛli dusu tiɲɛna kosɔbɛ, a y’a fɔ  Sayuli ye ko: ‘Komi i tɛ mɛnni kɛra tugun Jehova fɛ, a bena masacɛ wɛrɛ sugandi.’ Samuyɛli yɛlɛmana ko a be taga dɔrɔn, Sayuli ye a ka fani dagolo minɛ ani a faranna. Samuyɛli y’a fɔ Sayuli ye ko: ‘Jehova ye masaya bɔsi i la.’ Jehova tun bena masaya di mɔgɔ dɔ ma min tun bena a kanu ani ka mɛnni kɛ a fɛ.