Yehowa hala kojolɔi koni amɛnyiɛ Israelbii lɛ ahiɛ. Shi Israelbii lɛ kɛɛ amɛmiitao maŋtsɛ. Amɛkɛɛ Samuel akɛ: ‘Maji ni bɔle wɔ lɛ fɛɛ yɛ maŋtsɛmɛi. Wɔ hu wɔmiisumɔ ni wɔná eko.’ Samuel nu he akɛ nɔ ni amɛbiɔ lɛ lɛ ehiii, no hewɔ lɛ esɔle ehã Yehowa yɛ he. Shi Yehowa hã lɛ hetoo akɛ: ‘Jeee bo mɛi lɛ ekwa lɛ. Mi amɛkwa lɛ. Kɛɛmɔ amɛ akɛ, amɛbaaná maŋtsɛ, shi maŋtsɛ lɛ baabi nibii pii yɛ amɛdɛŋ.’ Be ni Samuel yakɛɛ amɛ lɛ, amɛhere nɔ akɛ: ‘Ekɔɔɔ wɔhe eko. Hã wɔ maŋtsɛ!’

Yehowa kɛɛ Samuel akɛ, nuu ko ni atsɛɔ lɛ Saul ji mɔ klɛŋklɛŋ ni baaye amɛnɔ maŋtsɛ. Be ni Saul yasara Samuel yɛ Rama lɛ, Samuel fɔ lɛ mu, ni tsɔɔ akɛ ekɛ fɔ krɛdɛɛ ko shwie eyiteŋ.

Sɛɛ mli lɛ, Samuel tsɛ Israelbii lɛ fɛɛ kɛba koni etsɔɔ amɛ mɔ ni ahala akɛ amɛmaŋtsɛ lɛ. Shi atao Saul aahu anaaa he ni etsɔ. Ani ole he ni no mli lɛ eyɔɔ? No mli lɛ, eyatee yɛ amɛjatsui lɛ ateŋ. Be ni amɛyana lɛ lɛ, amɛkɛ lɛ ba ni amɛkɛ lɛ badamɔ mɛi lɛ ateŋ. Saul kɛ fe mɛi ni yɔɔ jɛmɛ lɛ fɛɛ, ni ehe hu yɛ fɛo. Samuel kɛɛ mɛi lɛ akɛ: ‘Nyɛkwɛa mɔ ni Yehowa ehala lɛ.’ Mɛi lɛ bolɔ akɛ: ‘Maŋtsɛ lɛ yi aná wala!’

Shishijee mli lɛ, Maŋtsɛ Saul bo Samuel toi ni ebo Yehowa hu toi. Shi sɛɛ mli lɛ, efite. Akɛ nɔkwɛmɔnɔ lɛ, be ko lɛ, eyashã afɔle yɛ afɔleshaa latɛ lɛ nɔ, eyɛ mli akɛ ebɛ hegbɛ akɛ efeɔ nakai. No mli lɛ, Samuel ekɛɛ lɛ akɛ emɛ lɛ. Shi Samuel baaa mra. No hewɔ lɛ, Saul diɛŋtsɛ shã afɔle lɛ. Be ni Samuel ba lɛ, ani ole nɔ ni ekɛɛ lɛ? Ekɛɛ lɛ akɛ: ‘Kulɛ esaaa akɛ ogboɔ Yehowa nɔ toi.’ Ani Saul kase nɔ ko yɛ esha ni efee nɛɛ mli?

Sɛɛ mli lɛ, Saul tee koni ekɛ Amalekbii lɛ ayawu. Samuel kɛɛ lɛ akɛ, egbe mɔ fɛɛ mɔ, ekashi mɔ ko mɔ ko. Shi Saul egbeee Agag, ni ji Amalekbii lɛ amaŋtsɛ lɛ. Yehowa kɛɛ Samuel akɛ: ‘Saul ekwa mi, ebooo mi toi.’ Edɔ Samuel waa ni ekɛɛ Saul akɛ: ‘Akɛni obooo Yehowa toi dɔŋŋ hewɔ lɛ, Yehowa baawó maŋtsɛ  kroko.’ Be ni Samuel tsɔ ehe ni eeya lɛ, Saul mɔ etade lɛ mli ni etade lɛ gbala. Kɛkɛ ni Samuel kɛɛ lɛ akɛ: ‘Yehowa ehe maŋtsɛyeli lɛ yɛ odɛŋ.’ Yehowa kɛ maŋtsɛyeli lɛ baahã mɔ ko ni baasumɔ lɛ ni ebo lɛ toi.