E karekeia taani motikitaeka Iehova bwa a na kaiririia tibun Iteraera, ma a tangira riki te uea. A taku nakon Tamuera: ‘Iai aia uea natannaomata nako aika i rarikira. Ti tangira naba ara uea.’ E iangoia Tamuera bwa e kairua aei ngaia are e a tataroia nakon Iehova. E taku Iehova nakoina: ‘A aki rawa iroum, ma a bon rawa irou. Tuangia bwa e kona n reke aia uea ma ane e na tangiri baika bati mairouia.’ Ma e ngae n anne, a taku aomata: ‘Ti aki tabe iai. Ti bon tangira te uea!’

E tuanga Tamuera Iehova bwa e na riki te mwaane ae arana Tauro bwa te moan uea. Ngke e nako Tauro ni kawara Tamuera i Rama, ao e a kabiraki naba bwa te uea ngke e kabwaroa Tamuera te bwaa i aon atuna.

Imwina, e botiia tibun Iteraera Tamuera bwa e na kaota aia uea ae boou nakoia. Ma a aki roko n te nora Tauro. Ko ataia bwa bukin tera? E karabaa i buakoni bwaai. Ngke a a kunea Tauro, a kairia ni kaotinakoa ao a kateia i nukaia aomata. E abwabwaki riki Tauro nakoia aomata ni kabane, ao e rangi ni botonimwaane. E taku Tamuera: ‘Nora ana aomata Iehova ae e rineia.’ Ao a tatakarua aomata ni kangai: “E na abwabwaki maiun te uea!”

N te moantai, e kakauongo raoi te Uea ae Tauro nakon Tamuera ao e ongeaba iroun Iehova. Ma e a bitaki imwina riki. N te katoto, e aki riai te uea n anga taiani karea. N te tai teuana, e tuanga Tauro Tamuera bwa e na taningaa rokona, ma e aki waekoa n roko Tamuera. Ngaia are e a iangoia Tauro bwa e na anga taiani karea. Tera aron Tamuera iai? E taku nakon Tauro: ‘Ko a tia n aki ongeaba nakon Iehova.’ E reke reireian Tauro man ana kairua?

Imwina riki, e nako Tauro ni buakania tibun Amareka ao e tuangaki iroun Tamuera bwa akea ae e na kamaiua. Ma e iangoia Tauro bwa e na aki tiringa te Uea ae Akaka. E taku Iehova nakon Tamuera: ‘E a tia ni kitanai Tauro ao e aki ongo ni bwanaau.’ E rangi n nanokawaki Tamuera ao e taku nakon Tauro: ‘Ibukina bwa  ko a aki ongeaba iroun Iehova, e na rinea te uea riki temanna.’ Ngke e rairaki Tamuera bwa e nangi nako, ao Tauro e a taua naba rabin ana kunnikai Tamuera ao e a raeuaaki. Ao e taku Tamuera nakon Tauro: ‘E a tia Iehova n raeuaa te nakoa n uea mairoum.’ E na anga te tautaeka n uea Iehova nakon temanna ae e ongeaba irouna ao n tangiria.