Jehova het de Israelite ja Richter gee, wo si füehred. Si wend aber lieber en König. Si säged zum Samuel: «Di andere Völker hend alli en König. Mir wend au eine!» De Samuel weiss, dass das falsch isch und wege dem betet er zu Jehova. Jehova erklärt ihm: «S Volk isch nid gege dich, sondern si wend mich nid. Säg de Israelite, dass si en König chönnd ha. Aber säg ihne au, dass er vil vo ihne wird verlange und dass si das vil wird choschte.» S Volk antwortet ihm: «Das isch üs gliich. Mir wend en König!»

Jehova seit em Samuel, dass de erscht König en Maa wird sii, wo Saul heisst. Wo de Saul uf Rama chunnt, salbt de Samuel ihn zum König. Er nimmt Öl und giessts em Saul über de Chopf.

E chli später versammlet de Samuel d Israelite und wett ihne de König vorstelle. De Saul isch niene ume. Wo isch er echt? Er versteckt sich hinder em Gepäck. Wo d Israelite ihn endlich finded, holed si ihn und stelled ihn i d Mitti vo de Lüt. De Saul isch vil grösser als alli andere und er gseht sehr guet us. De Samuel seit: «Lueged! Das isch de Maa, wo Jehova als König usgwählt het.» S Volk isch begeischteret und jublet ihm zue!

Am Afang lost de Saul uf de Samuel und folget eso Jehova. Leider änderet sich das glii. De Saul dörf zum Bispil nid Opfer darbringe. Einisch seit de Samuel zum Saul, er söll uf ihn warte. De Saul mag aber nid warte bis de Samuel chunnt und tuet selber opfere. Wie reagiert denn de Samuel, wo er chunnt? Er seit zum Saul: «Du hesch Jehova nid gfolget. Das isch en Fehler.» Was meinsch, lernt de Saul echt öppis us sim Fehler?

Später zieht de Saul i Chrieg gege d Amalekiter. De Samuel git ihm de Uftrag, dass niemer dörf am Lebe bliibe. Aber de Saul entscheidet sich, de Agag, ihre König, nid z töte. Da seit Jehova zum Samuel: «De Saul lost nid uf mich. Er het mich verlaa.» Das macht de Samuel sehr truurig. Er seit zum Saul: «Wil du Jehova nüm folgsch, wird er öpper andersch zum König mache.» Wo de Samuel weglauft, packt de Saul ihn am Mantel und de Mantel riisst. De Samuel seit zu ihm: «Genau eso het Jehova hüt d Königsmacht vo dir weggrisse.» Jehova wird aber d Königsmacht öpperem gee, wo ihn gern het und uf ihn lost.