Jehová ningo omoĩ vaʼekue hués ogia hag̃ua umi israelítape, péro upéi haʼekuéra oipota peteĩ rréi ogoverna chupekuéra. Upévare heʼi hikuái Samuélpe: “Entéro umi ótro tetã ningo oreko peteĩ rréi, ha ore roipota avei peteĩ rréi oregoverna vaʼerã”. Samuélpe g̃uarã noĩporãi upéva, upémarõ oñemboʼe Jehovápe, ha Jehová heʼi chupe: “Ndahaʼéi ningo ndéve la nderrechasa hikuái, síno chéve la cherrechasa hína. Ere pe puévlope amoĩtaha chupekuéra peteĩ rréi, péro upe rréi oexihitaha chupekuéra heta mbaʼe”. Upéicharamo jepe umi hénte heʼi: “¡Lomímonte! Ore roipota peteĩ rréi oregoverna vaʼerã”.

Upéi Jehová heʼi Samuélpe peteĩ kuimbaʼe hérava Saúl haʼetaha pe primer rréi. Al día sigiénte Saúl oho Ramápe ovisita hag̃ua Samuélpe, ha Samuel oñohẽ iñakãre aséite ohechauka hag̃ua Jehová oiporavo hague chupe rreirã.

Upéi Samuel ombyaty umi israelítape opresenta hag̃ua chupekuéra pe rréi pyahu. Péro ndotopái hikuái Saúlpe. ¿Reikuaápa mbaʼérepa ndojuhúi chupe hikuái? Pórke Saúl okañy hína kuri umi kárga apytépe. Upéi hasýpe otopa chupe hikuái ha ogueru chupe umi hénte oĩháme. Saúl ijyvateve vaʼekue enterovévagui ha iporãiterei vaʼekue. Upéi Samuel heʼi pe puévlope: “Kóva hína pe rréi Jehová oiporavo vaʼekue peẽme g̃uarã”. Ha umi israelita osapukái hatã ha heʼi: “¡Toñevendesi pe rréipe!”.

Ñepyrũrã Saúl ojapo vaʼekue Samuel heʼíva chupe ha iñeʼẽrendu Jehovápe. Péro upéinte ou tuicha okambia. Por ehémplo Saúl ndovaléi kuri oikuaveʼẽ sakrifísio Jehovápe. Ha peteĩ día, Samuel heʼi porã kuri Saúlpe ohaʼarõ hag̃ua chupe haʼe oikuaveʼẽ hag̃ua pe sakrifísio. Péro Samuel nog̃uahẽpyaʼéi ha Saúl haʼéntema oikuaveʼẽ pe sakrifísio. ¿Mbaʼépa ojapo Samuel? Haʼe heʼi chupe: “Nde nderejapói la Jehová heʼi haguéicha ndéve”. ¿Oaprendépa raʼe Saúl iñeʼẽrendu vaʼerãha Jehovápe?

Upéi Saúl oho oñorairõ hag̃ua umi amalequítandi ha Samuel heʼi porã chupe ojukapaite hag̃ua chupekuéra, ndohejái vaʼerã vívo ni peteĩme. Péro Saúl odesidi ndojukáinte pe rréi Agágpe. Upéi Jehová heʼi Samuélpe: “Saúl ningo chemboyke ha naiñeʼẽrenduvéi chéve”. Samuel ombyasyeterei la oikóva ha heʼi Saúlpe: “Nde nderejapói la Jehová heʼíva ndéve, upévare  haʼe oiporavóta ótro rréi nde rekoviarã”. Upéi Samuel ojere oho hag̃uáicha, péro Saúl ojagarra chupe ijao ruguáigui, ha osoro la ijao ruguái. Ha Samuel heʼi Saúlpe: “Ko che ao remondoro haguéicha chehegui, Jehová oipeʼáta ndehegui ne rréino”. Jehová oiporavóta Saúl rekoviarã peteĩ rréi iñeʼẽrendu ha ohayhu añetéva chupe.