Jehovah ko de whẹdatọ lẹ do Islaelivi lẹ ji nado deanana yé, amọ́ yé jlo na tindo ahọlu de. Yé dọna Samuẹli dọmọ: ‘Akọta he lẹdo mí lẹpo wẹ tindo ahọlu lẹ. Mílọsu jlo na tindo ahọlu.’ Nuhe biọ yé te lọ ma sọgbe to nukun Samuẹli tọn mẹ, enẹwutu e hodẹ̀ hlan Jehovah gandego. Jehovah sọ dọna ẹn dọmọ: ‘E ma yin hiẹ wẹ mẹlọ lẹ gbẹdai, ṣigba yẹn gbẹdai wẹ yé te. Dọna yé dọ yé gán tindo ahọlu, amọ́ ahọlu lọ na biọ nususu sọn yé si.’ Mahopọnna enẹ, yé dọmọ: ‘Enẹ ma yin nude. Ahọlu dín wẹ mí te!’

Jehovah dọna Samuẹli dọ dawe de he nọ yin Sauli wẹ na yin ahọlu tintan lọ. Whenue Sauli yì dla Samuẹli pọ́n to Lama, Samuẹli kọ̀n amì do ota na Sauli bo gbọnmọ dali de e taidi ahọlu.

To nukọn mẹ, Samuẹli ylọ Islaelivi lẹpo pli nado do ahọlu yọyọ yetọn hia yé. Ṣigba, yé dín Sauli bo ba ẹ pò. A yọ́n nuhe zọ́n ya? E ko whlá ede do agbàn lẹ ṣẹnṣẹn. Whenue yé wá mọ Sauli, yé de e tọ́n bo hẹn ẹn ṣite to gbẹtọ lọ lẹpo ṣẹnṣẹn. Sauli dite hú yemẹpo bosọ yọnwhanpẹ taun. Samuẹli sọ dọmọ: ‘Mì pọ́n mẹhe Jehovah ko de lọ.’ Yemẹpo sọ dawhá dọmọ: ‘Gbẹ̀gaa na ahọlu!’

To bẹjẹeji, Ahọlu Sauli nọ dotoaina Samuẹli bosọ nọ setonuna Jehovah. Ṣigba, e wá diọ. Di apajlẹ, e ma yin ahọlu wẹ dona nọ basi avọ́sinsan lẹ. To gbèdopo, Samuẹli dọna Sauli dọ ni nọtepọn emi, amọ́ Samuẹli ma yawu wá. Enẹwutu, Sauli de nado jẹ avọ́sinsan lọ lẹ basi ji. Nawẹ Samuẹli yinuwa gbọn? E dọna ẹn dọmọ: ‘A ma dona ko vẹtolina Jehovah.’ Be Sauli na plọnnu sọn nuṣiwa etọn mẹ ya?

To nukọn mẹ, whenue Sauli yì funawhàn sọta Amalẹkinu lẹ, Samuẹli dọna ẹn dọ ni ma pò mẹde dogbẹ̀ blo. Amọ́, Sauli de ma nado hù Ahọlu Agagi. Jehovah dọna Samuẹli dọmọ: ‘Sauli ko jo mi do, e masọ nọ dotoaina mi ba.’ Ehe vẹna Samuẹli taun bọ e dọna Sauli dọ: ‘Na hiẹ masọ to tonusena Jehovah ba wutu, ewọ na de ahọlu devo.’ Dile Samuẹli lẹkọ jei, Sauli hẹn awù etọn go bọ tónu awù lọ tọn tlẹ́n.  To whenẹnu, Samuẹli dọna Sauli dọ: ‘Jehovah ko tlẹ́n ahọluduta lọ sọn asi we.’ Jehovah na yí ahọluduta lọ na mẹdevo he na yiwanna ẹn bo nasọ nọ setonuna ẹn.