Jehovakwe nitre kukwe ükatekä mikani nitre Israel jie ngwanka, akwa niaratre tö namani rei tuai ja gobraine. Ye medenbätä, niaratre niebare Samuel ie: ‘Juta mada mada ye jökrä kwe rei tärä, nun tö rei tuai iti jakwe arato’. Ye ñaka namani tuin kwin Samuel ie. Ye ngwane Samuel orabare Jehovai aune niarakwe Samuel kukwei kani ngäbiti: ‘Juta ye ñaka tä ja mike mä ye ai rüere, ñakare aune tätre ja mike ti ne ara rüere. Niaratre yekwe rei raba nemen, akwa rei ye käkwe kukwe keta kabre ribedi niaratre ie ye mäkwe nie ietre’. Akwa yebiti ta, nitre namani niere: ‘¡Ñaka töbika! ¡Nun tö rei iti ie!’.

Angwane, Jehovakwe niebare Samuel ie ni kädekata Saúl ye rabai reire. Saúl nikani basare Samuel ie kä Ramá yekänti angwane, Samuel käkwe niara dianinkä, ye bämikakäre aceite kekani kwe dokwäbiti, mikakäre gare niara ye rabai reire.

Ye bitikäre, Samuel nitre Israel ükaninkrö rei mrä mikakäre tuare ietre. Akwa Saúl nämene medente ñaka namani kwen jire. ¿Ñobätä gare mäi? Ñobätä ñan aune niara nämene ja ükani tribe nämene kabre ye ngätäite. Mrä mada niara kwani ye ngwane, niara dianinkä kä yekänti aune mikani nünaninkä nitre Israel ngwärekri. Niara ye nämene bäri nga kwin nitre mada mada ye kräke aune bä nuäre krubäte. Samuel niebare: ‘Nire dianinkä Jehovakwe mike ñärärä’. Aune nitre käkwe niebare ja dibiti: ‘¡Rei mä nüna jankunu!’.

Kenanbe, rei Saúl nämene Samuel kukwe nuin aune nämene Jehová mike täte. Akwa ye bitikäre ja töi kwitani kwe. Bati, Samuel niebare Saúl ie niara rabadre ngübare jondron kukwakäre. Jondron kukwadre ye rei ñaka rabadre nuainne. Akwa Samuel ñaka namani nüke jötrö, aisete Saúl jondron ye kukwani kaibe. ¿Samuel dre nuainbare? Niebare kwe ie: ‘Mäkwe Jehová mikadre täte, akwa mäkwe ñaka nunie’. ¿Saúl käre Jehová mikadre täte ye nükani gare ie?

Ye bitikäre, Saúl janamene rüre nitre Amaleq ben ye ngwane nitre jökrä murie ketadre kwe Samuel niebare ie. Akwa Saúl ja töi mikani ñaka rei Agag murie kete. Angwane Jehovakwe niebare Samuel ie: ‘Saúl ti  tuanimetre, ñaka niena ti mike täte’. Samuel namani ulire krubäte, yebätä niebare kwe Saúl ie: ‘Jehová bike rei mada denkä ñobätä ñan aune mä ñaka niena niara mike täte’. Samuel nikwitaninte ja jiebiti ye ngwane, niara nakani dänbiti Saúl ie aune dän ye nötaninte kisete. Samuel niebare Saúl ie: ‘Ye erere Jehovakwe gobran mäkwe ye diainkä mäkän’. Jehovakwe gobran ye biandi ni madai, ni ye käkwe niara taredi aune mikai täte ye meden gäräbare kwe.