Yéhuwah wis mènèhi hakim kanggo mimpin bangsa Israèl. Tapi, bangsa kuwi péngin nduwé raja. Bangsa Israèl ngomong karo Samuèl, ’Kabèh bangsa nduwé raja. Aku ya péngin nduwé raja.’ Samuèl ngrasa nèk kuwi salah. Mula, Samuèl ndonga. Yéhuwah njawab, ’Dudu kowé sing ditolak bangsa kuwi. Aku sing ditolak. Ngomonga nèk bangsa kuwi éntuk nduwé raja. Tapi, raja kuwi éntuk njaluk apa waé saka wong-wong mau.’ Bangsa kuwi njawab, ’Ora masalah. Sing penting, wènèhana aku raja.’

Yéhuwah ngandhani Samuèl nèk wong lanang sing jenengé Saul bakal dadi raja Israèl sing pertama. Wektu ketemu Saul ing kutha Rama, Samuèl nuangké minyak ing sirahé Saul. Kuwi tandha nèk Saul sing dipilih dadi raja.

Terus, Samuèl ngongkon bangsa Israèl ngumpul merga péngin nduduhké raja sing anyar. Tapi, Saul ora ana. Kowé ngerti ora Saul ing ngendi? Saul ngumpet ing antarané barang-barang. Akhiré, Saul ketemu. Terus, Saul dikon ngadeg ing tengah-tengahé bangsa kuwi. Saul kuwi sing paling dhuwur ing antarané wong-wong mau. Dhèwèké ya nggantheng banget. Samuèl ngomong, ’Iki pilihané Yéhuwah.’ Wektu ndelok Saul, wong-wong kuwi seneng banget.

Mauné, Raja Saul manut Yéhuwah lan Samuèl. Tapi, bar kuwi dhèwèké ora manut manèh. Contoné, Saul sakjané ora éntuk mènèhké korban. Dhèwèké ya wis dikon ngentèni nganti Samuèl teka. Tapi, Samuèl ora teka-teka. Akhiré, Saul mènèhké korban kuwi dhéwé. Piyé tanggepané Samuèl? Samuèl ngomong karo Saul, ’Kuduné kowé manut Yéhuwah.’ Apa Saul bakal berubah?

Wektu perang nglawan bangsa Amalèk, Saul dikandhani Samuèl nèk kabèh wong Amalèk kudu dipatèni. Tapi, Saul ora matèni Raja Agag. Yéhuwah ngomong karo Samuèl, ’Saul wis ora manut karo aku.’ Samuèl sedhih banget. Dhèwèké ngomong karo Saul, ’Merga kowé  ora manut, Yéhuwah bakal milih raja liya kanggo nggantèni kowé.’ Pas Samuèl arep lunga, Saul nyekeli pucuk jubahé Samuèl nganti suwèk. Samuèl ngomong karo Saul, ’Kaya jubah sing suwèk iki, Yéhuwah bakal njupuk kerajaan iki saka kowé.’ Yéhuwah bakal mènèhké kerajaan kuwi kanggo wong sing manut lan sayang karo Yéhuwah.