Li Jehobʼa kixkʼehebʼ aj raqol aatin rehebʼ laj Israel re xbʼeresinkilebʼ, abʼan aʼanebʼ keʼxpatzʼ jun awabʼej. Ut keʼxye re laj Samuel: «Ebʼ li tenamit wankebʼ xʼawabʼej, laaʼo naqaj ajwiʼ jun». Laj Samuel kixkʼoxla naq aʼin moko us ta. Tojaʼ naq, kitijok chiru li Jehobʼa, ut aʼan kisumenk re: «Li tenamit moko laaʼat ta nakatxtzʼeqtaana, laaʼin yook intzʼeqtaanankil. Ye rehebʼ naq tinkʼehebʼ xʼawabʼej, abʼan li awabʼej aʼin naabʼal tixpatzʼ rehebʼ». Usta ebʼ li poyanam xeʼrabʼi aʼin, keʼxye: «Maakʼaʼ naxye! Naqaj jun awabʼej».

Tojaʼ naq, li Jehobʼa kixye re laj Samuel naq jun li winq li naxkʼabʼaʼi Saul t-oq joʼ xbʼeen awabʼej. Naq laj Saul kiwulak rilbʼal laj Samuel aran Rama, laj Samuel kixhoy aseeyt saʼ xjolom laj Saul re xkʼutbʼesinkil naq tkanaaq choʼq awabʼej.

Chirix chik aʼan, laj Samuel kixchʼutubʼebʼ laj Israel re xxaqabʼankil chiruhebʼ li akʼ awabʼej. Abʼan maabʼar chik nekeʼxtaw laj Saul. Ma nakaanaw kʼaʼut? Xbʼaan naq muqmu saʼ xyanq ebʼ li iiq. Naq xeʼxtaw, xeʼrisi chaq aran ut xeʼxxaqabʼ chiru li tenamit. Jwal najt roq chiruhebʼ chixjunil ut kʼajoʼ xchaqʼal ru. Laj Samuel kixye: «Ilomaq ani kixsikʼ ru li Jehobʼa». Ut ebʼ li poyanam xeʼxjap re: «Sahaq taxaq xchʼool li awabʼej!».

Saʼ xtiklajik, li awabʼej Saul naʼabʼink chaq chiru laj Samuel ut chiru li Jehobʼa. Abʼan moqon kixjal xnaʼlebʼ. Jun sut, laj Samuel kixye re laj Saul naq t-oybʼeniiq re mayejak. Li awabʼej maakʼaʼ xleseens re xyeechiʼinkil ebʼ li mayej. Abʼan laj Samuel kibʼayk chi wulak, joʼkan naq, laj Saul xkoho chi mayejak xjunes. Kʼaru kixbʼaanu laj Samuel? Kixye re: «Tento raj xat-abʼink chiru li Jehobʼa ut inkʼaʼ xaabʼaanu». Ma xtzol tawiʼ laj Saul naq tento t-abʼinq junelik chiru li Jehobʼa?

Chirix chik aʼan, laj Saul xkoho chi yalok saʼ xbʼeenebʼ laj Amaleq, ut laj Samuel kixye re, naq maajun tixkanabʼ chi yoʼyo. Abʼan, laj Saul inkʼaʼ kixkamsi li awabʼej Agag. Tojaʼ naq, li Jehobʼa kixye re laj Samuel: «Laj Saul xinxtzʼeqtaana, inkʼaʼ chik naʼabʼink chiwu». Kʼajoʼ kirahoʼk saʼ  xchʼool laj Samuel, joʼkan naq kixye re laj Saul: «Li Jehobʼa tixsikʼ jun chik li awabʼej xbʼaan naq laaʼat inkʼaʼ chik nakat-abʼink chiru». Naq laj Samuel kixbʼalqʼusi ribʼ, laj Saul kixchap chire li raqʼ, ut naxqʼich. Laj Samuel kixye re laj Saul: «Chi joʼkan tixtʼup chaawu li Jehobʼa li awabʼejilal». Aʼin naraj xyeebʼal naq li Jehobʼa tixkʼe li awabʼejilal re jalan chik li poyanam li narahok re chi tzʼaqal ut naʼabʼink chiru.