Jehova nĩ aahete Aisiraeli atuanĩri cira nĩguo mamatongoragie, no rĩu meendaga mũthamaki. Meerire Samueli ũũ: ‘Ndũrĩrĩ iria ciothe itũthiũrũrũkĩirie irĩ na athamaki. O na ithuĩ nĩ tũrenda mũthamaki.’ Samueli onire macio marĩ mahĩtia, na kwoguo akĩhoya Jehova ũndũ-inĩ ũcio. Jehova aamwĩrire ũũ: ‘Tiwe mararega nĩ niĩ. Meere no magĩe na mũthamaki, no kwĩ maũndũ maingĩ mũthamaki arĩendaga meke.’ O na kũrĩ ũguo, andũ moigire ũũ: ‘Tũtiramakio nĩ ũguo. Tũrenda mũthamaki!’

Jehova eerire Samueli atĩ mũndũ wetagwo Saulu nĩwe ũngĩatuĩkire mũthamaki wa mbere Isiraeli. Rĩrĩa Saulu aathiire Rama kũrĩ Samueli, nĩ aaitĩrĩirio maguta nĩ Samueli nĩguo atuĩke mũthamaki.

Thutha ũcio, Samueli nĩ eetire Aisiraeli othe nĩguo amonie mũthamaki wao. No mationire Saulu handũ. Hihi nĩ ũĩ nĩkĩ? Tondũ eehithĩte kũrĩa indo ciaigagwo. Rĩrĩa maamuonire, maamũgĩrire magĩũka makĩmũrũgamia mbere ya andũ. Saulu aarĩ mũraihu gũkĩra andũ arĩa angĩ othe na aarĩ mũthaka mũno. Samueli aamerire ũũ: ‘Ũyũ nĩwe Jehova athuurĩte.’ Nao andũ makĩanĩrĩra makiuga: ‘Ngai arotũũria mũthamaki ũyũ witũ!’

Kĩambĩrĩria-inĩ Mũthamaki Saulu nĩ aathikagĩrĩria Samueli na agathĩkĩra Jehova. No nĩ aacokire agĩcenjia. Kwa ngerekano, mũthamaki ndaagĩrĩirũo nĩ kũruta magongona. Hĩndĩ ĩmwe Samueli nĩ eerire Saulu amweterere, ĩndĩ agĩcererũo nĩ gũkinya. Nĩ ũndũ ũcio, Saulu nĩ aatuire itua rĩa kũruta igongona we mwene. Samueli eekire atĩa? Aamwĩrire ũũ: ‘Ndũkwagĩrĩirũo kũremera Jehova.’ Hihi Saulu nĩ angĩerutire kuumana na mahĩtia make?

Thutha-inĩ rĩrĩa Saulu aathire kũrũa na Aamaleki, mũnabii Samueli aamwĩrire ndakahonokie mũndũ o na ũmwe. No Saulu ndooragire Mũthamaki Agagi. Jehova eerire Samueli ũũ: ‘Saulu nĩ andiganĩirie na ndarathikĩrĩria.’ Samueli nĩ aaiguire ũũru mũno  na akĩra Saulu ũũ: ‘Tondũ nĩ ũtigĩte gwathĩkagĩra Jehova, nĩ egũthuura mũthamaki ũngĩ.’ Rĩrĩa Samueli aatuire gũthiĩ, Saulu nĩ aamũguthũkĩire akĩnyita kagooti gake na gagĩtarũka. Nake Samueli akĩmwĩra ũũ: ‘Jehova nĩ agayania ũthamaki waku.’ Jehova eendaga kũheana ũthamaki ũcio kũrĩ mũndũ ũngĩamwendire na amwathĩkagĩre.