Jehova okwa li a pa Ovaisrael ovatokolipangeli ve va wilike, ashike ova li va hala ohamba. Ova li va lombwela Samuel tava ti: ‘Oiwana aishe oyo ye tu dingilila oi na eehamba. Nafye otwa hala ohamba.’ Samuel okwa li e udite kutya oshinima sha tya ngaho osha puka, nomolwaasho okwa li a ilikana kuJehova kombinga yasho. Jehova okwa li a lombwela Samuel ta ti: ‘Ovanhu haave va ekelashi, aame va ekelashi. Va lombwela kutya otava dulu okukala ve na ohamba, ashike ohamba otai ke va pula va ninge oinima ihapu.’ Ashike nande ongaho, ovanhu ova li va nyamukula tava ti: ‘Katu na ko nasha. Fye otwa hala ohamba!’

Jehova okwa li a lombwela Samuel kutya omulumenhu wedina Saul oye ta ka ninga ohamba yotete. Eshi Saul a li a ka talela po Samuel muRama, Samuel okwa li e mu vaeka a ninge ohamba, mokutila omaadi eemono momutwe waye.

Konima yefimbo, Samuel okwa li a lombwela Ovaisrael va ongale opo e va ulikile ohamba yavo ipe. Ashike kava li ve shii kutya Saul oku li peni. Mbela ou shii kutya omolwashike? Omolwaashi okwa li a hondama mokati koinima. Eshi ovanhu va li va mona Saul, ova li ve mu eta ndele tave mu kaleke ofika mokati kovanhu. Saul okwa li mule e dule ovanhu aveshe, nokwa li e na olupe liwa. Samuel okwa lombwela ovanhu ta ti: ‘Taleni oo a hoololwa kuJehova.’ Ovanhu ova ingida tava ti: ‘Ohamba nai kale nomwenyo mule!’

Potete, ohamba Saul oya li hai dulika kuJehova nokuSamuel, ndele konima yefimbo oya ka lunduluka. Pashihopaenenwa, ohamba kaya li i na okuyamba omayambo. Pomhito imwe, Samuel okwa li a lombwela Saul e mu teelele, ashike Samuel ka li e uya diva. Onghee hano, Saul okwa li a tokola okuyamba omayambo. Mbela Samuel okwa li e linyenga ngahelipi? Okwa lombwela Saul ta ti: ‘Owa li u na okudulika kuJehova.’ Mbela Saul okwa li ngoo e lihonga oshilihongomwa mepuko laye?

Pomhito imwe eshi Saul a li a ka lwifa Ovaamalek, Samuel okwa li e mu lombwela aha xupife nande osha. Ashike Saul okwa li a tokola aha dipae ohamba Agag. Jehova okwa li a lombwela Samuel ta ti: ‘Saul okwa ekela nge shi, noiha pwilikine kwaame.’ Samuel okwa li a nyika oluhodi neenghono, ndele ta lombwele Saul ta ti: ‘Molwaashi iho dulika vali kuJehova, ota ka  hoolola ohamba imwe.’ Fimbo Samuel a li ta piluka a ye, Saul okwa li e mu nukila moshikutu ndele ta pombola omungenge washo. Opo nee Samuel okwa li e mu lombwela a ti: ‘Jehova okwe ku kufa ouhamba.’ Jehova okwa li ta ka yandja ouhamba komunhu umwe oo e mu hole noha dulika kuye.