មេរៀនទី៣៩
ស្ដេចដំបូងរបស់ជនជាតិអ៊ីស្រាអែល
ព្រះយេហូវ៉ាបានប្រើអ្នកសម្រេចក្ដីឲ្យដឹកនាំបណ្ដាជនអ៊ីស្រាអែល។ ប៉ុន្តែ ឥឡូវបណ្ដាជនចង់បានស្ដេច។ ពួកគេនិយាយទៅសាំយូអែលថា៖ ‹គ្រប់ប្រជាជាតិនៅជុំវិញយើងសុទ្ធតែមានស្ដេច។ ពួកយើងក៏ចង់បានស្ដេចដែរ›។ សាំយូអែលមានអារម្មណ៍ថាមិនត្រឹមត្រូវទេ ដូច្នេះគាត់អធិដ្ឋានជម្រាបព្រះយេហូវ៉ា។ ព្រះយេហូវ៉ាប្រាប់គាត់ថា៖ ‹បណ្ដាជននេះមិនមែនបដិសេធអ្នកទេ។ ប៉ុន្តែ ពួកគេបដិសេធខ្ញុំ។ ចូរទៅប្រាប់ពួកគេថា ពួកគេអាចមានស្ដេចបាន តែស្ដេចនោះនឹងតម្រូវអ្វីៗជាច្រើនពីពួកគេ›។ ប៉ុន្តែ បណ្ដាជនតបថា៖ ‹យើងមិនខ្វល់ទេ។ យើងចង់បានស្ដេច!›។
រួចមក ព្រះយេហូវ៉ាប្រាប់សាំយូអែលថា បុរសម្នាក់ឈ្មោះសុល នឹងក្លាយជាស្ដេចដំបូងរបស់ពួកគេ។ ដូច្នេះ ពេលសុលទៅជួបសាំយូអែលនៅក្រុងរ៉ាម៉ា សាំយូអែលបានចាក់ប្រេងលើក្បាលសុល ដើម្បីតែងតាំងគាត់ជាស្ដេច។
បន្ទាប់មក សាំយូអែលបានកោះហៅបណ្ដាជនអ៊ីស្រាអែលឲ្យមកជួបជុំគ្នា ដើម្បីឲ្យពួកគេឃើញស្ដេចថ្មីរបស់ពួកគេ។ ប៉ុន្តែ ពួកគេរកសុលមិនឃើញឡើយ។ តើអ្នកដឹងថាហេតុអ្វីទេ? ពីព្រោះសុលកំពុងលាក់ខ្លួនក្នុងគំនរអីវ៉ាន់។ នៅទីបំផុត ពួកគេរកឃើញសុល ហើយនាំគាត់ចេញមកឈរនៅកណ្ដាលចំណោមបណ្ដាជន។ សុលមានកម្ពស់ខ្ពស់ជាងពួកគេទាំងអស់ ហើយសង្ហាណាស់។ សាំយូអែលប្រកាសឡើងថា៖ ‹សូមមើល! នេះជាបុរសដែលព្រះយេហូវ៉ាបានជ្រើសរើស›។ បណ្ដាជនបន្លឺសំឡេងយ៉ាងខ្លាំងថា៖ ‹សូមឲ្យស្ដេចមានអាយុវែង!›។
ដំបូង ស្ដេចសុលបានស្ដាប់សាំយូអែល ហើយធ្វើតាមបង្គាប់ព្រះយេហូវ៉ា។ ប៉ុន្តែ ក្រោយមកគាត់បានផ្លាស់ប្ដូរ។ ជាឧទាហរណ៍ ស្ដេចគ្មានសិទ្ធិជូនគ្រឿងបូជាឡើយ។ មានពេលមួយ សាំយូអែលបានប្រាប់សុលឲ្យរង់ចាំគាត់មកដល់សិន តែគាត់មិនបានមកដល់ភ្លាមៗទេ។ ដូច្នេះ សុលក៏សម្រេចចិត្តជូនគ្រឿងបូជាដោយខ្លួនឯង ទោះជាគាត់គ្មានសិទ្ធិក៏ដោយ។ តើសាំយូអែលនិយាយយ៉ាងណា? គាត់ប្រាប់សុលថា៖ ‹អ្នកគួរតែស្ដាប់បង្គាប់ព្រះយេហូវ៉ា›។ តើសុលបានរៀនពីកំហុសរបស់ខ្លួនទេ?
មានពេលមួយទៀត កាលសុលចេញទៅច្បាំងនឹងពួកអាម៉ាលេក សាំយូអែលបានប្រាប់សុលថា អ្នកមិនត្រូវទុកជីវិតអ្នកណាម្នាក់ឡើយ។ ប៉ុន្តែ សុលមិនបានសម្លាប់ស្ដេចអាកាក់ទេ។ ព្រះយេហូវ៉ាប្រាប់សាំយូអែលថា៖ ‹សុលបានបោះបង់ចោលខ្ញុំ ហើយលែងស្ដាប់បង្គាប់ខ្ញុំទៀត›។ សាំយូអែលព្រួយចិត្តជាខ្លាំង ហើយប្រាប់សុលថា៖ ‹ដោយសារអ្នកមិនធ្វើតាមបង្គាប់ព្រះយេហូវ៉ា លោកនឹងជ្រើសរើសស្ដេចមួយទៀត›។ កាលដែលសាំយូអែលបែរខ្លួនដើរចេញ សុលចាប់ទាញជាយអាវរបស់សាំយូអែល ធ្វើឲ្យជាយអាវគាត់រហែក។ សាំយូអែលប្រាប់សុលថា៖ ‹ព្រះយេហូវ៉ាបានដកហូតការគ្រប់គ្រងចេញពីអ្នកហើយ›។ ព្រះយេហូវ៉ានឹងប្រគល់ការគ្រប់គ្រងទៅឲ្យមនុស្សម្នាក់ទៀត ដែលស្រឡាញ់និងស្ដាប់បង្គាប់លោក។
«ការស្ដាប់បង្គាប់គឺប្រសើរជាងការជូនគ្រឿងបូជា»។—សាំយូអែលទី១ ១៥:២២
លោកអ្នកក៏ប្រហែលជាចូលចិត្តដែរ
គម្ពីរបរិសុទ្ធ តើរៀបរាប់អំពីអ្វី?
ជនជាតិអ៊ីស្រាអែលចង់មានស្ដេច
ពេលដែលបណ្ដាជនអ៊ីស្រាអែលសុំឲ្យមានស្ដេច ព្រះយេហូវ៉ាបានជ្រើសរើសសូល។ ហេតុអ្វីបានជាព្រះយេហូវ៉ាតែងតាំងដាវីឌឲ្យធ្វើជាស្ដេចជំនួសស្ដេចសូល?
