Jiova bin dɔn gi di Izrɛlayt dɛn jɔj dɛn fɔ lid dɛn, bɔt dɛn bin want pɔsin fɔ bi dɛn kiŋ. Dɛn tɛl Samiɛl se: ‘Ɔl di ɔda neshɔn dɛn we de arawnd wi gɛt kiŋ dɛn. Wisɛf want wan.’ Samiɛl bin fil se dis rɔng, so i pre to Jiova bɔt am. Jiova tɛl am se: ‘Nɔto yu di pipul dɛn nɔ de obe. Na mi dɛn nɔ de obe. Tɛl dɛn se dɛn go gɛt kiŋ, bɔt i go tɛl dɛn fɔ du bɔku tin fɔ am.’ Pan ɔl dat, di pipul dɛn se: ‘Wi nɔ kia. Wi want kiŋ!’

Jiova tɛl Samiɛl se wan man we nem Sɔl go bi di fɔs kiŋ. We Sɔl bin go fɛn Samiɛl na wan ples we dɛn kɔl Rama, Samiɛl anɔynt Sɔl as kiŋ bay we i put ɔyl na in ed.

Leta Samiɛl kɔl di Izrɛlayt dɛn fɔ kam togɛda fɔ mek i sho dɛn di nyu kiŋ. Bɔt dɛn nɔ ebul fɔ si Sɔl ɛnisay. Yu no wetin mek? Na bikɔs i bin ayd usay di lod dɛn de. We dɛn si Sɔl, dɛn pul am kɔmɔt ɛn mek i tinap midul di pipul dɛn. Sɔl bin tɔl pas ɔlman, ɛn i bin rili fayn. Samiɛl tɔk se: ‘ Una si di wan we Jiova dɔn pik.’ Di pipul dɛn ala se: ‘Lɛ di kiŋ gɛt lɔng layf!’

Fɔs, Kiŋ Sɔl bin lisin to Samiɛl ɛn obe Jiova. Bɔt leta i chenj. Fɔ ɛgzampul, di kiŋ nɔ bin gɛt rayt fɔ mek sakrifays dɛn. Wan tɛm, Samiɛl bin tɛl Sɔl fɔ mek i wet fɔ am, bɔt Samiɛl nɔ bin kam wantɛm wantɛm. So Sɔl bin disayd fɔ mek di sakrifays dɛn fɔ insɛf. Wetin Samiɛl bin du? I tɛl am se: ‘Yu nɔ fɔ dɔn du wetin Jiova nɔ want.’ Sɔl bin lan lɛsin frɔm in mistek?

Leta, we Sɔl bin go fɔ go fɛt di Amalɛkayt dɛn, Samiɛl bin tɛl Sɔl fɔ mek i kil dɛn ɔl. Bɔt Sɔl bin disayd se i nɔ go kil Kiŋ Egag. Jiova bin tɛl Samiɛl se: ‘Sɔl dɔn tɔn in bak pan mi, ɛn i nɔ de lisin to mi.’ Samiɛl in at bin rili pwɛl, ɛn i tɛl Sɔl se: ‘Bikɔs yu  dɔn stɔp fɔ du wetin Jiova want, i go pik ɔda kiŋ.’ As Samiɛl tɔn in bak fɔ go, Sɔl grip am ɛn di ɛj pat pan Samiɛl in klos chɛr. Dɔn Samiɛl tɛl Sɔl se: ‘Jiova dɔn pul di kiŋdɔm na yu an.’ Jiova go gi di kiŋdɔm to di wan we go lɛk am ɛn obe am.