တၢ်မၤလိ ၃၉
အံၣ်စရ့လးအစီၤပၤအဆိကတၢၢ်တဂၤ
ယဟိဝၤယွၤဃုထၢထီၣ် ပှၤစံၣ်ညီၣ်ကွီၢ်တဖၣ်ဒ်သိး ကကဲခိၣ်ကဲနၢ်လၢပှၤအံၣ်စရ့လးဖိတဖၣ်အဖီခိၣ်လီၤ. ဘၣ်ဆၣ် ပှၤအံၣ်စရ့လးဖိတဖၣ် လီကီဝဲစီၤပၤတဂၤလီၤ. အဝဲသ့ၣ်တဲဘၣ်စီၤၡမူၤအ့လးလၢ– ‘ကယဲၢ်ထံကီၢ်လၢအအိၣ်ဝးတရံးပှၤန့ၣ် အဝဲသ့ၣ်အိၣ်ဒီးအစီၤပၤလီၤ. ပအဲၣ်ဒိးအိၣ်ဒီးစီၤပၤတဂၤမီၤ.’ စီၤၡမူၤအ့လးသ့ၣ်ညါဝဲလၢ ပှၤအံၣ်စရ့လးဖိတဖၣ် ဃ့ထီၣ်ဝဲစီၤပၤန့ၣ် မ့ၢ်တၢ်လၢ အကမၣ်ဝဲအဃိ အဝဲဃ့ဘါထုကဖၣ်တၢ်လၢ ယဟိဝၤယွၤအအိၣ်လီၤ. ဒီးယဟိဝၤယွၤတဲဘၣ်စီၤၡမူၤအ့လးလၢ– ‘ပှၤဂီၢ်မုၢ်တဖၣ်န့ၣ် တပာ်တ့ၢ်ကွံာ်နၤဘၣ် မ့ၢ်အဝဲသ့ၣ်ပာ်တ့ၢ်ကွံာ်ယၤလီၤ. ဒီးတဲဘၣ်ပှၤအံၣ်စရ့လးဖိတဖၣ်လၢ အဝဲသ့ၣ်ကဒိးန့ၢ်ဘၣ်ဝဲစီၤပၤတဂၤ, ဘၣ်ဆၣ် စီၤပၤကဃ့တၢ်လၢအဝဲသ့ၣ်အအိၣ် အါမးလီၤ.’ ပှၤဂီၢ်မုၢ်တဖၣ်တဲဆၢက့ၤဝဲလၢ– ‘တဘၣ်နီတမံၤဘၣ်. ပအဲၣ်ဒိးအိၣ်ဒီးစီၤပၤတဂၤလီၤ.’
ယဟိဝၤယွၤ တဲဘၣ်စီၤၡမူၤအ့လးလၢ ပိာ်ခွါတဂၤလၢအမံၤမ့ၢ် စီၤစီလူးန့ၣ်ကကဲထီၣ်ဘၣ်ဝဲ ပှၤအံၣ်စရ့လးဖိတဖၣ် အစီၤပၤအဆိကတၢၢ်တဂၤလီၤ. ဖဲစီၤစီလူးလဲၤအိၣ်သကိး စီၤၡမူၤအ့လးလၢဝ့ၢ်ရၤမါအခါ စီၤၡမူၤအ့လး ဖှူဝဲစီၤစီလူးအခိၣ်လၢသိ ဒ်သိးအဝဲကကဲထီၣ်စီၤပၤအဂီၢ်လီၤ.
လၢခံန့ၣ် စီၤၡမူၤအ့လးကိးဖှိၣ်ဝဲ ပှၤအံၣ်စရ့လးဖိတဖၣ် ဒ်သိးကဒုးနဲၣ်အဝဲသ့ၣ် လၢမတၤတဂၤကမ့ၢ်စီၤပၤလဲၣ်န့ၣ်လီၤ. ဘၣ်ဆၣ် ပှၤဃုစီၤစီလူးတဘၣ်နီတပူၤဘၣ်. ဘၣ်မနုၤအဃိလဲၣ်န့ၣ် မ့ၢ်နသ့ၣ်ညါဧါ. မ့ၢ်လၢ စီၤစီလူးအိၣ်ခူသူၣ်လၢ တၢ်ဘံၣ်တၢ်ဘိၣ်အကျါလီၤ. ဒီးဖဲအဝဲသ့ၣ်ထံၣ်စီၤစီလူးအခါ ပှၤမၢစီၤစီလူးဂဲၤဆၢထၢၣ်လၢ ပှၤဂီၢ်မုၢ်တဖၣ်အခၢၣ်သးလီၤ. ဖဲစီၤစီလူးဂဲၤဆၢထၢၣ်အခါ အနီၢ်ထီန့ၢ်ဒံးပှၤကိးဂၤဒဲး ဒီးဒိၣ်တၢ်ဂ့ၤဒိၣ်မးလီၤ. ဒီးစီၤၡမူၤအ့လးတဲဝဲလၢ– ‘ပှၤတဂၤအံၤ မ့ၢ်ပှၤလၢယဟိဝၤယွၤ ဃုထၢထီၣ်အီၤလီၤ.’ ပှၤဂီၢ်မုၢ်တဖၣ်ကိးပသူထီၣ်ဝဲလၢ– ‘မ်စီၤပၤ အိၣ်မူဘၣ်ဖးယံာ်တက့ၢ်.’
ဖဲစီၤစီလူးကဲထီၣ်စီၤပၤသီသီအခါ အဝဲဒိကနၣ်စီၤၡမူၤအ့လး ဒီးယဟိဝၤယွၤအကလုၢ်လီၤ. ဘၣ်ဆၣ်လၢခံန့ၣ် စီၤစီလူးအတၢ်ပာ်သူၣ်ပာ်သး ဆီတလဲဝဲလီၤ. အဒိ တၢ်လၢစီၤပၤန့ၣ် တအိၣ်ဒီးတၢ်ခွဲးတၢ်ယာ်လၢ ကလုၢ်ထီၣ်တၢ်ဘၣ်. ဘၣ်တဘျီန့ၣ် စီၤၡမူၤအ့လးမၢစီၤစီလူးအိၣ်ခိးအီၤ ဘၣ်ဆၣ် စီၤၡမူၤအ့လးဟဲဝဲတတုၤ တဘျီဃီဘၣ်. အဃိ စီၤစီလူးလုၢ်ထီၣ်တၢ်လၢ အနီၢ်ကစၢ်လီၤ. စီၤၡမူၤအ့လးထံၣ်ဝဲ စီၤစီလူးဒ်လဲၣ်. စီၤၡမူၤအ့လးတဲဘၣ်စီၤစီလူးလၢ– ‘ဘၣ်မနုၤအဃိ နတဒိကနၣ်ယဟိဝၤယွၤအကလုၢ်လဲၣ်.’ စီၤစီလူး မၤကမၣ်တၢ်ဝံၤအလီၢ်ခံ မ့ၢ်အဝဲဟံးန့ၢ်တၢ်မၤလိစ့ၢ်ကီးဧါ.
လၢခံန့ၣ် ဖဲစီၤစီလူးလဲၤဒုးဝဲပှၤဧမၤလ့းဖိအခါ စီၤၡမူၤအ့လးတဲဘၣ်စီၤစီလူးလၢ နကဘၣ်မၤသံအဝဲသ့ၣ်ခဲလၢာ်လီၤ. ဘၣ်ဆၣ် စီၤစီလူးတမၤသံဝဲ စီၤပၤအၤကးဘၣ်. အဃိ ယဟိဝၤယွၤတဲဘၣ် စီၤၡမူၤအ့လးလၢ– ‘စီၤစီလူးပာ်တ့ၢ်ကွံာ်ယၤလံ. ဒီးအဝဲတဒိကနၣ်ယကလုၢ်ဘၣ်.’ စီၤၡမူၤအ့လးသးအုးဝဲဒိၣ်မး ဒီးတဲဘၣ်စီၤစီလူးလၢ– ‘ခီဖျိလၢ နတဒိကနၣ် ယဟိဝၤယွၤအကလုၢ်လၢၤဘၣ်အဃိ ကစၢ်ယွၤကဃုထၢထီၣ်စီၤပၤလၢ အသီတဂၤလီၤ.’ ဖဲစီၤၡမူၤအ့လးဃၣ်တရံးအသးဒ်သိး ကက့ၤဝဲအခါ စီၤစီလူးဖ့ၣ်ထုးဝဲအဆ့ကၤခီၣ်ထံး တုၤလၢအညာ်ကွံာ်ဝဲလီၤ. ဝံၤဒီး စီၤၡမူၤအ့လးတဲဘၣ်စီၤစီလူးလၢ– ‘ယဟိဝၤယွၤဖှီညာ်ကွံာ်ဘီမုၢ်လၢနအိၣ်လံ. ဒီးယဟိဝၤယွၤကဟ့ၣ်လီၤက့ၤ ဘီမုၢ်အံၤလၢ ပှၤလၢအအဲၣ်ယဟိဝၤယွၤဒီး ဒိကနၣ်အကလုၢ်န့ၣ်လီၤ.’
“ဒိကနၣ်တၢ်န့ၣ် ဂ့ၤန့ၢ်လုၢ်တၢ်.”—၁ ၡမူၤအ့လး ၁၅:၂၂
တၢ်ဂ့ၤအဂၤလၢ နကဘၣ်သး
လံာ်စီဆှံအံၤ အတၢ်ကစီၣ် မ့ၢ်မနုၤလဲၣ်
ပှၤအံၣ်စရ့လးဖိတဖၣ် ဃ့ထီၣ်ဝဲစီၤပၤတဂၤ
ဖဲပှၤအံၣ်စရ့လးဖိတဖၣ် ဃ့ထီၣ်ဝဲစီၤပၤတဂၤအဆၢကတီၢ်, ယဟိယွၤဃုထၢထီၣ်ဝဲ စီၤစီလူး. ဘၣ်မနုၤအဃိ ယဟိဝၤယွၤဃုထၢထီၣ် စီၤဒၤဝံးလၢစီၤစီလူးအလီၢ်လဲၣ်
