Yaˬhoˉvaˬ lehˬ Iˉsaˍreˍlaˆ chaw htaꞈ sheh kʼai tuˬ suhˉ jehˬ shehˍ hpaˆ laiˉ gʼaˇ htaꞈ leuˆ yuˬ ve yoˬ. Yaꞈ hkʼaˇ, Iˉsaˍreˍlaˆ chaw jawˇ mawˇ cawˬ gaˇ ve yoˬ. Yawˇ hui Saˍmo˗eˍlaˆ htaꞈ kʼoˆ piˇ ve, ‘ngaˬ hui awˬ paˇ awˬ kui chehˇ ve chaw ceuˬ teˇ ceuˬ le le yawˇ hui jawˇ mawˇ cawˬ ve hkʼa shuˍ ngaˬ hui kaꞈ cawˬ gaˇ ve yoˬ.’ Awˬ lawn chi ve maˇ cawˇ tehꞈ Saˍmo˗eˍlaˆ dawˇ ve yoˬ. Hkʼe te leh, yawˇ Yaˬhoˉvaˬ geh bon lawˬ ve yoˬ. Yaˬhoˉvaˬ Saˍmo˗eˍlaˆ htaꞈ kʼoˆ piˇ ve, ‘yawˇ hui nawˬ htaꞈ chiˇ baˬ ve maˇ heˆ. Ngaˬ htaꞈ chiˇ baˬ ve yoˬ. Yawˇ hui jawˇ mawˇ cawˬ gaˇ ve kʼo, cawˬ hpehꞈ ve yoˬ tehꞈ yawˇ hui htaꞈ ca kʼoˆ piˇ˗oˆ. Yaꞈ hkʼaˇ, jawˇ mawˇ yawˇ hui geh laiˉ ceuˬ lawˬ yuˬ tuˬ yoˬ.’ Yawˇ hui kʼoˆ ve, ‘hkʼaˬ hkʼe hpehꞈ ve htawˇ, ngaˬ hui jawˇ mawˇ cawˬ gaˇ ve yoˬ!’

Yaˬhoˉvaˬ Saˍmo˗eˍlaˆ htaꞈ kʼoˆ piˇ ve, Iˉsaˍreˍlaˆ chaw ve jawˇ mawˇ awˉ lawˉ teˇ gʼaˇ lehˬ yaˇ nehˬ Sawˉluꞈ meh ve yoˬ. Sawˉluꞈ Raˍmaˆ venˇ lo Saˍmo˗eˍlaˆ geh kʼai ve yoˬ. Saˍmo˗eˍlaˆ Sawˉluꞈ ve oˉ kʼoˍ htaꞈ naˍ manˇ ngeuˍ pfuhˍ piˇ leh yawˇ htaꞈ jawˇ mawˇ te tcuh ve yoˬ.

Oˇ ve hkʼawꞈ nawˉ, Iˉsaˍreˍlaˆ chaw yawˇ hui ve jawˇ mawˇ awˉ lawˉ teˇ gʼaˇ htaꞈ mawˬ tuˬ, Saˍmo˗eˍlaˆ yawˇ hui htaꞈ kuˬ hpawnˬ ve yoˬ. Yaꞈ hkʼaˇ, yawˇ hui Sawˉluꞈ htaꞈ ca maˇ mawˬ. Aˬ htoꞈ ma pa taw le shiˍ˗aˬ laˇ? Awˬ lawn kʼo, Sawˉluꞈ mawˇ teh taˍ kuiˬ lo vaꞈ chehˇ taˍ ve yoˬ. Sawˉluꞈ htaꞈ ca mawˬ peuˬ hkʼawꞈ nawˉ, Iˉsaˍreˍlaˆ chaw awˬ kaˍ lo yawˇ htaꞈ huˉ tcuh taˍ ve yoˬ. Sawˉluꞈ lehˬ shu aꞈ kehˉ mvuh leh awˬ hkiˇ awˬ naˬ daꞈ jaˇ ve yoˬ. Saˍmo˗eˍlaˆ kʼoˆ ve, ‘Yaˬhoˉvaˬ leuˆ yuˬ taˍ ve chaw chi teˇ gʼaˇ yoˬ.’ Mvuhˇ miˬ yaˇ teˇ gʼaˇ le le kuˬ leh kʼoˆ ve, ‘jawˇ mawˇ˗o, co zuhˬ ha zuhˬ cawˬ piˇ˗oˆ!’

Awˉ lawˉ htaˇ lehˬ jawˇ mawˇ Sawˉluꞈ Saˍmo˗eˍlaˆ kʼoˆ ve hkʼe gʼaꞈ te leh Yaˬhoˉvaˬ hkawˇ na yuˬ ve yoˬ. Yaꞈ hkʼaˇ, awˬ hkʼawꞈ nawˉ htaˇ yawˇ pa kʼai ve yoˬ. Teˇ pawˆ htaˇ Saˍmo˗eˍlaˆ Sawˉluꞈ htaꞈ kʼoˆ piˇ ve yawˇ gaˬ la htaˇ hkʼa gaˬ law taˍ˗oꞈ. Yaꞈ hkʼaˇ, yawˇ laˬ naiˇ leh a hkaw˗anˬ maˇ cawˬ ve tuˉ tanˇ tuˬ htaꞈ tuˉ tanˇ ve yoˬ. Saˍmo˗eˍlaˆ hkʼaˬ hkʼe dawˇ ve le? Yawˇ Sawˉluꞈ htaꞈ kʼoˆ piˇ ve, ‘nawˬ Yaˬhoˉvaˬ hkawˇ na yuˬ cawˇ ve yoˬ.’ Yaꞈ hkʼaˇ, yawˇ maˇ kʼawꞈ dawˇ hpfuhˆ.

Oˇ ve hkʼawꞈ nawˉ, Sawˉluꞈ Aˍmaˍlehˆ chaw htaꞈ ca bawˆ daꞈ htaˇ, Saˍmo˗eˍlaˆ yawˇ htaꞈ kʼoˆ piˇ ve Aˍmaˍlehˆ chaw hkʼa peu˗eˬ htaꞈ tiˇ pehˍ˗o. Yaꞈ hkʼaˇ, Sawˉluꞈ jawˇ mawˇ Aˍgaˆ htaꞈ maˇ tiˇ pehˍ. Yaˬhoˉvaˬ Saˍmo˗eˍlaˆ htaꞈ kʼoˆ piˇ ve, ‘Sawˉluꞈ ngaˬ htaꞈ baˬ taˉ peuˬ. Yawˇ ngaˬ hkawˇ maˇ na yuˬ.’ Saˍmo˗eˍlaˆ nyi ma  luˬ jaˇ leh Sawˉluꞈ htaꞈ kʼoˆ piˇ ve, ‘nawˬ Yaˬhoˉvaˬ hkawˇ maˇ na yuˬ ve pa taw, nawˬ awˬ tan jawˇ mawˇ te tuˬ awˬ nu ve chaw teˇ gʼaˇ htaꞈ yawˇ kʼawꞈ leuˆ yuˬ tuˬ yoˬ.’ Hkʼe te leh, Saˍmo˗eˍlaˆ teˇ hpawˇ lo hpfuhˆ peu ve teˇ yanˇ, Sawˉluꞈ Saˍmo˗eˍlaˆ ve aˉ poꞈ meuˇ lo gʼaꞈ tcuhˆ leh aˉ poꞈ tzuhꞈ sheˬ ve yoˬ. Saˍmo˗eˍlaˆ Sawˉluꞈ htaꞈ kʼoˆ piˇ ve, ‘Yaˬhoˉvaˬ nawˬ htaꞈ jawˇ mawˇ maˇ te tcuh laˇ˗o.’ Yaˬhoˉvaˬ lehˬ yawˇ htaꞈ haꞈ leh yawˇ hkawˇ na yuˬ ve chaw teˇ gʼaˇ htaꞈ Sawˉluꞈ awˬ tan jawˇ mawˇ te tuˬ leuˆ yuˬ tuˬ te chehˇ ve yoˬ.