Jehova naafile Maisilaele baatuli kuli babaetelele, kono nebabata mulena. Kihaa bali ku Samuele: ‘Macaba kaufela alupotolohile anani malena. Ni luna lubata kuba ni mulena.’ Samuele naaikutwa kuli taba yeo neifosahalile, kacwalo ataluseza Jehova ka za teñi mwa tapelo. Jehova kihaa li ku yena: ‘Batu habahani wena. Bahana na. Ubataluseze kuli bakona kuba ni mulena kono ukabata kuli bamuezeze lika zeñata.’ Kusina taba ni zeo, batu bali: ‘Hakuna butata. Lubata mulena!’

Jehova abulelela Samuele kuli muuna yabizwa Saule naakaba yena mulena wapili wa Isilaele. Saule hanaaile kuyo potela Samuele kwa Rama, Samuele atoza Saule sina mulena ka kumusela oli fa toho yahae.

Hasamulaho, Samuele akopanya Maisilaele kuli ababonise mulena wabona yomunca. Kono nebasa koni kubona Saule. Kana mwaziba libaka? Kakuli naaipatile mwa libyana. Hase bafumani Saule, bamutisa mi bamuyemisa mwahalaa batu. Saule neli yena yomutelele kufita batu kaufela, mi neli yomunde hahulu. Samuele kihaa li: ‘Mubone muuna yaketilwe ki Jehova.’ Batu bahuwa kuli: ‘Mulena apile nako yetelele!’

Kwa makalelo, Mulena Saule naateelelize ku Samuele mi naautwa Jehova. Kono cwale acinca. Ka mutala, mulena naasaswaneli kufa matabelo. Nako yeñwi, Samuele abulelela Saule kuli alibelele kuli atahe, kono Samuele naasika taha kapili. Kacwalo, Saule aikatulela kufa matabelo yena muñi. Samuele naaezizeñi? Samuele kihaa li: ‘Neuswanela kumamela taelo ya Jehova.’ Kana Saule naaka ituta kwa mafosisa anaaezize?

Hamulaho, Saule hanaaile kuyo lwanisa Maamaleke, Samuele abulelela Saule kuli asike asiya nihaiba alimuñwi ku bona. Kono Saule naasika bulaya Mulena Agagi. Jehova kihaa li ku Samuele: ‘Saule unifulalezi mi haniiutwi.’ Samuele naaswabile hahulu, mi abulelela Saule kuli: ‘Bakeñisa kuli utuhezi kuutwa Jehova, ukaketa  mulena usili.’ Samuele hanaafetuha kuli aye, Saule amuswala mi mungundo wa siapalo sa Samuele wapazuha. Cwale Samuele ali ku Saule: ‘Jehova upazuzi mubuso wa Isilaele kuuzwisa ku wena.’ Jehova naakafa mubuso ku mutu usili yanaaka mulata ni kumuutwa.