Yehowa uvua mupeshe bena Isalele balumbulushi bua kubalombola, kadi bakajinga mukalenge. Bakambila Samuele ne: ‘Bisamba bionso bidi bitunyunguluke bidi ne bakalenge. Tudi petu dijinga ne mukalenge.’ Samuele wakamona ne: bualu abu buvua bubi, ke kusambilaye Yehowa bua tshilumbu atshi. Yehowa wakamuambila ne: ‘Bena Isalele kabena bakubenga wewe to. Udibu babenga mmeme. Bambila ne: nebapete mukalenge kadi mukalenge au neabalombe malu a bungi.’ Nansha nanku, bantu bakamuambila ne: ‘Abi kabiena ne bualu to. Tuetu tudi dijinga ne mukalenge!’

Yehowa wakambila Samuele ne: muntu uvuabu babikila ne: Shaula ke uvua ne bua kuikala mukalenge wa kumpala. Pavua Shaula muye kumonangana ne Samuele ku Lama, Samuele wakela Shaula manyi bua ikale mukalenge pa kumupongoluela manyi mu mutu.

Pakapita matuku, Samuele wakabikidisha bena Isalele bonso pamue bua kubaleja mukalenge wabu mupiamupia. Kadi kabakamupeta muaba nansha umue to. Udi mumanye mbua tshinyi anyi? Bualu uvua musokome mu mabuki. Pakapetabu Shaula ndekelu wa bionso, bakamupatula, kumuimanyikabu munkatshi mua bantu. Shaula uvua mule kupite bantu bonso, ne uvua muimpe be! Samuele wakabambila ne: ‘Muntu udi Yehowa musungule nyeye eu.’ Bantu bakela mbila bamba ne: ‘Mukalenge ikale ne muoyo matuku a bungi!’

Kumpala mukalenge Shaula uvua uteleja Samuele ne utumikila Yehowa. Kadi pashishe wakashintukuka. Tshilejilu, kabavua banyishile mukalenge bua kulambula milambu to. Kadi dituku dikuabu Samuele wakambila Shaula bua amuindile alue, kadi Samuele kakalua diakamue to. Ke Shaula kuangata dipangadika dia kudilambuila milambu ayi nkayende. Samuele wakenza tshinyi? Wakamuambila ne: ‘Kuvua ne bua kubenga kutumikila Yehowa to.’ Tshilema tshia Shaula etshi tshivuaku tshimulongeshe bualu anyi?

Pakapita matuku, pavua Shaula muye bua kuluangana ne bena Amaleka, Samuele wakambila Shaula ne: kushiyi muntu nansha umue wa kudibu ne muoyo to. Kadi Shaula wakabenga bua kushipa mukalenge Agaga. Yehowa wakambila Samuele ne: ‘Shaula  mmundekele, ki munteleje to.’ Samuele wakabungama bikole, kuambilaye Shaula ne: ‘Bu muudi mulekele kutumikila Yehowa, yeye neasungule mukalenge mukuabu.’ Pavua Samuele mukudimuke bua kuya, Shaula wakamukuata, luzembe lua muzabi wa Samuele kutukalu. Ke Samuele kuambila Shaula ne: ‘Yehowa mmukutule bukalenge.’ Yehowa uvua ne bua kufila bukalenge kudi muntu mukuabu uvua mua kumunanga ne kumutumikila.