Jehova ne oketo jong’ad bura mondo ota Jo-Israel, kata kamano, Jo-Israel ne oramo ni gidwaro ruoth. Ne giwacho ne Samuel kama: ‘Ogendni duto ma jirendewa nigi ruodhi. Wan be wadwaro ruoth.’ Samuel ne oneno ni gima Jo-Israel ne dwarono ne en gima rach, omiyo ne olemo konyiso Jehova wachno. Jehova ne onyiso Samuel niya: ‘Kik ipar ni in e ma ji ok dwari. An e ma ok gidwara. Nyisgi ni gibiro yudo ruoth ka gidwaro, to gibed ka ging’eyo ni ruodhno biro dwaro gik mang’eny ahinya kuomgi.’ Kata kamano, ji noramo niya: ‘Mago ok wadwar winjo. Wan wadwaro ruoth!’

Jehova ne onyiso Samuel ni ng’at moro miluongo ni Saulo e ma ne dhi bedo ruoth. Ka ne Saulo odhi Rama limo Samuel, Samuel ne owalo Saulo mondo e ma obed ruoth kuom olo mo e wiye.

Ka ne Samuel oluongo Jo-Israel duto mondo onyisgi ruodhgi, ne ok ginyal yudo Saulo. Be ing’eyo gimomiyo? Nikech ne opondo e tok gik moko. Ka ne giyudo Saulo, ne gikele ma gichunge e dier ji. Saulo ne bor mohingo ji duto, kendo ne ojaber nyowuoyo. Samuel nowacho kama: ‘Neuru jal ma Jehova oyiero.’ Ji ne okok matek ka giwacho niya: ‘Ruoth mondo odag aming’a!’

E kinde ma ne oket Saulo mondo obed ruoth, ne oluwoga chike Jehova kendo ne owinjo Samuel bende. Kata kamano, ne oduogo olokore. Kuom ranyisi, nitie kinde moro ma Samuel ne onyiso Saulo mondo orite nyaka obi e ka mondo ochiw misango. To nikech Samuel ne bet obudho, Saulo nong’ado mar chiwo misango kata obedo ni ne ok oyiene timo kamano. Samuel ne oneno wachno nade? Ne onyiso Saulo kama: ‘Onego iwinj dwond Jehova.’ Be Saulo ne opuonjore kuom ketho ma ne otimono?

Kinde moro ka ne Saulo odhi kedo gi Jo-Amalek, Samuel ne onyise ni oneg Jo-Amalek te. Kata kamano, Saulo ne ok onego Ruoth Agag. Jehova ne onyiso Samuel niya: ‘Saulo oseweya, kendo ok owinja kata matin.’ Chuny Samuel ne obedo malit, kendo nonyiso Saulo niya:  ‘Nikech isetamori winjo wach Jehova, odhi yiero ruoth machielo moyiego.’ Ka ne Samuel koro wuok mondo odhi, Saulo ne omako bath nangane mi oyiech. Kae to Samuel ne onyiso Saulo ni: ‘Mana kaka lawni oyiech, e kaka Jehova bende oseyiecho pinyruodh Israel oa kuomi.’ Jehova ne dhi yiero ruoth machielo mohere kendo ma mako chikene.