Otoq che ok tqʼoʼn Jehová qe jwes kyxol aj Israel tuʼn kyonin kyiʼj, noqtzun tuʼnj, kyajtoq jun aj kawil. Tuʼntzunju, xi kyqʼamaʼn te Samuel: «Bʼaʼn tuʼn tok tqʼoʼna jun rey tuʼn tkawin qibʼaje, ik tzaʼn in bʼant kyuʼn kykyaqil nasyon». Nya bʼaʼn ela jlu toj twitz Samuel. Tuʼntzunju ok ten naʼl Dios te Jehová ex tzaj ttzaqʼweʼn jlu: «Mya aya in nel ikʼun kyuʼn, sino aʼyine. Qʼamanxa kye qa jaku ten jun aj kawil kyibʼaj ex bʼiʼx qʼamanxa kye tiʼj tkyaqilju kbʼajel kyiʼj tuʼnju rey ok tkawin kyibʼaj». Maske ikju, in kyqʼamaʼntoq xjal jlu: «Noq tzeʼnxku. ¡Oʼkx qaje tuʼn tok jun qreye!».

Xitzun tqʼamaʼn Jehová te Samuel qa jun xinaq Saúl tbʼi kʼokel te tnejel aj kawil. Tej tpon Saúl keʼyil te Samuel toj Ramá, jax tqoʼn aseyt toj twiʼ Saúl, tuʼn tkubʼ yekʼet qa atoq kʼokel te aj kawil.

Yajxitl, ok tchmoʼn Samuel qe aj Israel tuʼntzun t-xi tyekʼin akʼaj aj kawil kye. Noqtzun tuʼnj, mintiʼtoq in kanet Saúl kyuʼn. ¿Ojtzqiʼn tuʼna tiquʼn? Tuʼnju otoq tzʼokx tewin tibʼ kyxol nim iqtz. Tej tkanet kyuʼn, etz kyiʼn ex kubʼ kywabʼen kyxol kykyaqil xjal. Mastoq matij twaʼl kywitz qe txqantl ex mas tbʼanel keʼyin. Tqʼama Samuel jlu: «Mape kyile aju xjal ma jaw tskʼoʼn Qman tuʼn tok te aj kawil». Atzun kye xjal e jaw ẍchʼin: «¡Bʼaʼnwt tzʼela tqʼij aj kawil!».

Tnejel, in bʼintoq Saúl te Samuel ex in nimentoq te Jehová. Noqtzun tuʼnj, chʼexpaj. Toj jun maj xi tqʼamaʼn Samuel te Saúl tuʼn tyon tiʼj tuʼn t-xi kyqʼoʼn chojbʼil te Jehová. Mintiʼtoq qʼoʼn ambʼil te aj kawil tuʼn tkubʼ tpatin chojbʼil. Noqtzun tuʼnj, yaj pon Samuel, ex kubʼ tpatin Saúl oyaj tej naʼmxtoq tpon. ¿Tiʼ bʼant tuʼn Samuel? Tqʼama jlu: «Iltoq tiʼj tuʼn t-xi tnimana aju ma tma Qman teya ex mintiʼ ma bʼant tuʼna». ¿Elpe tnikʼ Saúl tiʼj qa toj tkyaqil ambʼil tuʼn tniman te Jehová?

Yajxitl, xi Saúl qʼojel kyukʼil aj Amalec ex xi tqʼamaʼn Samuel te tuʼn miʼn tkyaj anqʼin jun tuʼn. Noqtzun tuʼnj, mintiʼ kubʼ tbʼyoʼn Saúl aju aj kawil Agag. Tuʼntzunju tqʼama Jehová jlu te Samuel: «Ma tzʼel tpan tibʼ  Saúl wiʼje ex ya mintiʼ in niman weye». Tzaj nim tbʼis Samuel, tuʼntzunju xi tqʼamaʼn jlu te Saúl: «Kyjawil tskʼoʼn Jehová juntl aj kawil tuʼnju ya mintiʼ in xi tnimana». Tej tikʼ bʼet Samuel, tzaj ttzyuʼn Saúl ttxaʼn t-xbʼalun ex el tlaqin. Xi tqʼamaʼn Samuel jlu te Saúl: «Iktzun tten kʼelel tiʼn Jehová kawbʼil tuj tqʼabʼa». A t-xilen jlu qa kyxel tqʼoʼn Jehová kawbʼil te juntl xjal aju kʼokel tkʼujlaʼn ex kyxel tbʼiʼn.