Jyobaa yëˈë yajtuunë fesëty parë tnëˈëmooy ttuˈumooy ja israelitëty, per yëˈëty tsyojktë tuˈugë ryey. Pääty tˈanmääytyë Samuel: “Niˈamukë nax käjpn myëdäjttëp tuˈugë ryey, ëëtsëty nan ntsojktëbëts tuˈugë rey”. Samuel kyaj tˈoymyëdooy extëm ja israelitëty jyënandë. Ta ojts tmënuˈkxtaˈagyë Jyobaa ets yˈanmääyë: “Yëˈë käjpn, kyaj mijts mˈëxtijˈyëty, ëjtsën xyˈëxtijp. Anëëmëdë waˈan tmëdattë tuˈugë ryey, perë tadë rey kajaa tijaty yˈamdowäˈänëdë”. Per ta ja israelitëty jyënandë: “¡Waˈan duˈunëty! ¡Ntsojktëbëts tuˈugë rey!”.

Ta netë Jyobaa tˈanmääyë Samuel ko tuˈugë yetyëjk diˈib xyëwˈäjtypy Saúl, yëˈë diˈib tim jawyiin tunäämp rey. Ko Saúl ojts tkuˈixë Samuel jam Ramá, ta Samuel tyukutaamëˈkë aseytë parë nyigëxëˈëgët ko yëˈë tunäämp rey.

Ok, ta Samuel dyajtuˈukmujky ja israelitëty parë ttukˈixäˈändë ja jembyë rey. Per nimää ja Saúl kyayajpaty. ¿Mnijäˈäwëp tiko? Yëˈko të nety nyayuˈutsyëty mä nyipetyë tsëmy këˈëy. Ko tpattë, ta jap dyajpëtsëëmdë, ets ojts dyajnëjkxtë itkujky mä nety të tyuˈukmuktë ja israelitëty. Yëˈë nety diˈib mas këjxm tënaapy mä niˈamukë ja israelitëty ets jantsy tsujkoonë. Samuel jyënany: “Okˈixtë pënë Jyobaa të twinˈixy”. Ko ja israelitëty tˈijxtë ja ryey, ta jantsy jotkujk nyayjäˈäwëdë.

Tim jawyiin, ja rey Saúl myëjpëjtakë Samuel ets myëmëdoowë Jyobaa. Perë ok, ta tyëgäjtsy. Tëgok, ta Samuel tˈanmääyë Saúl ko kyaj tnayakët ja wintsëˈkën axtë koonëm yëˈë jyäˈtët, pes kyaj nety yëˈë pyaatyëty ets dyakët ja wintsëˈkën. Perë Samuel kyaj tsojk jyajty, päätyë Saúl dyajky ja wintsëˈkën. ¿Ti tyuunë Samuel? Ta tˈanmääy: “Tsojkëbë nety xymyëmëdowëdë Jyobaa, ets kyaj të xymyëmëdoy”. ¿Ojtsëdaa ti Saúl tyukniˈˈixëty ko duˈun tyëgooy?

Ok, ta Saúl ojts nyijkxy tsiptuumbë mët ja jäˈäyëty diˈib Amaleq, etsë Samuel ta yˈanmääyë ko niˈamukë jäˈäy dyaˈoˈktäˈäyët. Perë Saúl kyaj ojts dyaˈooky ja rey Agag. Ta netë Jyobaa tˈanmääyë Samuel: “Saúl tëts xymyastuˈuty ets kyajts xyˈokmëmëdoownë”. Samuel jantsy mon tuk  nyayjäˈäwë, päätyë Saúl tˈanmääy: “Jyobaa të twinˈixyë wiinkpë rey, mët ko mijts kyaj xyˈokmëmëdoownë”. Ko Samuel ojts jyëmbijnë, ta Saúl amëjääw myäjtsë wyitkëjxy ets ojts tkëˈtsë. Samuel ta tˈanmääyë Saúl: “Duˈun extëmtsë nwit të xykyëëtsy, nanduˈunë Jyobaa mbëjkxëyaˈanyëtyë kutujkën”. Tyäˈädë yëˈë yˈandijpy ko Jyobaa yëˈë nety myoˈoyaambyë kutujkënë ja wiinkpë diˈib tsokëdëp ets mëmëdowëdëp.