Jeova ear kõjerbal riekajet ro ñan tõl RiIsrael ro, ak armej rein rar kõn̦aan bwe en wõr juon aer kiiñ. Kõn men in rar ba ñan Samuel: ‘Aolep aelõñ ko jet ewõr aer kiiñ. Kõm bar kõn̦aan juon ad kiiñ.’ Samuel ear jab m̦õn̦õn̦õ kõn men in, innem ear jar kake ñan Jeova. Jeova ear ba ñane: ‘Ejjab kwe eo armej ran̦e rej jol̦o̦ke. Ña eo rej jol̦o̦ke. Ba ñan er bwe remaroñ kããlõt juon aer kiiñ, ak ren jel̦ã bwe ñe enaaj wõr juon aer kiiñ, enaaj lõñ men ko enaaj kõn̦aan bwe ren lil̦o̦k ñane.’ Meñe Samuel ear kõmel̦el̦eik armej ro kõn men in, ak rar ba: ‘Ej em̦m̦an wõt. Kõm kõn̦aan bwe en wõr juon ad kiiñ!’

Jeova ear ba ñan Samuel bwe Saul enaaj kiiñ eo m̦oktata. Ke Saul ear lol̦o̦k Samuel ilo Rema, Samuel ear kapiti bõran Saul kõn juon weil̦ ñan kaalikkar bwe em̦õj kããlõte bwe en kiiñ.

Tokãlik, Samuel ear kũrtok aolep RiIsrael ro bwe en kwal̦o̦k ñan er kiiñ eo aer, ak rar jaje ia eo Saul epãd ie. Kwõjel̦ã ke etke? Kõnke ear kũttiliek ilikin jet m̦weiuk. Ke rar loe Saul, rar ãñintok e im kajutake eol̦apãn armej ro. Saul ear lukkuun aetok im ineea jãn aolep, im ear lukkuun wũlio. Innem Samuel ear ba: ‘Eñin l̦eo Jeova ear kããlõte.’ Armej ro rar lam̦õj im ba: ‘Jeraam̦m̦an ñan kiiñ in ad!’

Ilo jinoin, Kiiñ Saul ear roñjake Samuel im pokake Jeova. Ak tokãlik, ear oktak. Ñan waanjoñak, juon iien Saul ear likũt menin katok ko ioon lokatok eo meñe ear jab mãlim ñan an kõm̦m̦ane men in. Ej kab m̦õj an kar Samuel jiroñe bwe en kõttar wõt e, ak kõn an kar Samuel rum̦wij, Saul ear wõnm̦aanl̦o̦k wõt im ajel̦o̦k menin katok eo. Kar ta l̦õmn̦ak eo an Samuel kõn men in Saul ear kõm̦m̦ane? Ear ba: ‘Kwõn kar pokake naan ko an Jeova.’ Saul ear ke katak jãn bõd in an?

Juon iien tokãlik ke Saul ear itõn tarin̦aeik RiAmelek ro, Samuel ear jiroñe bwe en m̦an aolepeer im jab likũt juon bwe en mour. Ak Saul ear jab m̦an Kiiñ Egag. Jeova ear ba ñan Samuel: ‘Em̦õj an Saul el̦l̦o̦k jãn eõ, im ejjab pokake eõ.’ Samuel ear lukkuun bũrom̦õj kõn men in, im  ear ba ñan Saul: ‘Kõnke ejako am̦ pokake Jeova, Enaaj bar kããlõt juon bwe en kiiñ.’ Ke Samuel ej jino an etal jãne, Saul ear dãpij kopã eo an Samuel im ear potak. Samuel ear ba ñan Saul: ‘Ãinwõt an potak kopã in, ãindein em̦õj an Jeova kekõl l̦o̦k aelõñin Israel jãn eok.’ Jeova enaaj lel̦o̦k aelõñ in ñan juon eo me ej yokwe im pokake E.