သင်ခန်းစာ ၃၉
အစ္စရေးနိုင်ငံရဲ့ ပထမဘုရင်
ယေဟောဝါက အစ္စရေးတွေကို ဦးဆောင်ဖို့ တရားသူကြီးတွေ ပေးထားသားနဲ့ သူတို့က ဘုရင်တစ်ပါး လိုချင်တယ်။ ဒါနဲ့ ‘တခြားလူမျိုးတွေလို ကျွန်တော်တို့ကို အုပ်ချုပ်မယ့် ဘုရင်တစ်ပါး ခန့်အပ်ပေးပါ’ လို့ ရှမွေလကို တောင်းဆိုကြတယ်။ ဒီလိုမလုပ်သင့်ဘူးလို့ ရှမွေလ ထင်တာနဲ့ အဲဒီအကြောင်း ယေဟောဝါကို ဆုတောင်းပြီး ပြောပြတယ်။ ယေဟောဝါက ‘သူတို့ မင်းကို ငြင်းပယ်တာ မဟုတ်ဘူး။ ငါ့ကို ငြင်းပယ်နေတာ။ သူတို့တောင်းဆိုတဲ့အတိုင်း လုပ်ပေးလိုက်။ ဒါပေမဲ့ ဘုရင်က သူတို့ဆီကနေ အများကြီးတောင်းဆိုမယ်လို့ ပြောလိုက်’ ဆိုပြီး ရှမွေလကို မိန့်ဆိုတယ်။ ဒါတောင်မှ လူတွေက ‘ဘာပဲဖြစ်ဖြစ်၊ ကျွန်တော်တို့ ဘုရင်လိုချင်တယ်’ တဲ့။
ဒီအခါ ယေဟောဝါက ရှောလုဟာ ပထမဘုရင်ဖြစ်လိမ့်မယ်လို့ ရှမွေလကို ပြောတယ်။ ဒါနဲ့ ရာမမြို့မှာရှိတဲ့ ရှမွေလဆီ ရှောလု ရောက်လာတဲ့အခါ သူ့ခေါင်းပေါ် ဆီလောင်းပြီး ဘုရင်အဖြစ် ဘိသိက်ပေးလိုက်တယ်။
အဲဒီနောက် ရှမွေလက ဘုရင်ကိုပြဖို့ အစ္စရေးတွေကို စုဝေးလိုက်တဲ့အခါ ရှောလုကို ရှာမတွေ့ကြဘူး။ ဘာလို့လဲသိလား။ အထုပ်အပိုးတွေကြားထဲမှာ ရှောလု ပုန်းနေလို့ပဲ။ သူ့ကိုရှာတွေ့ပြီး လူကြား ခေါ်ထုတ်လာတဲ့အခါ သူက အားလုံးထက် အရပ်ပိုမြင့်နေတယ်။ ရုပ်ကလည်း ချောတယ်။ ရှမွေလက ‘ဒီမှာကြည့်ကြ။ ယေဟောဝါဘုရား ရွေးချယ်တာ သူပဲ’ လို့ပြောတော့ လူတွေက ‘အရှင်မင်းကြီး အသက်တော်ရှည်ပါစေ’ လို့ကြွေးကြော်ကြတယ်။
အစမှာတော့ ရှောလုဟာ ရှမွေလပြောတာကို နားထောင်ပြီး ယေဟောဝါကို နာခံတယ်။ ဒါပေမဲ့ နောက်ပိုင်းမှာ ပြောင်းလဲသွားတယ်။ ဥပမာ၊ ဘုရင်ဆိုတာ ပူဇော်သက္ကာတွေ မဆက်သရဘူး။ တစ်ခါမှာ၊ ရှမွေလက သူ့ကိုစောင့်နေဖို့ ရှောလုကို မှာထားလျက်နဲ့ ရှမွေလ ရောက်လာဖို့ ကြာနေတဲ့အတွက် သူ့ဘာသာသူ ပူဇော်သက္ကာတွေ ဆက်သလိုက်တယ်။ ရှောလု ဒီလိုလုပ်တော့ ရှမွေလ ဘာလုပ်သလဲ သိလား။ ရှမွေလက ရှောလုကို ‘မင်း ယေဟောဝါဘုရားပေးတဲ့ ပညတ်ကို မနာခံဘူး’ လို့ ပြောတယ်။ ဒီအမှားကြောင့် ရှောလု သင်ခန်းစာ ရသလား။
နောက်ပိုင်း၊ အာမလက်လူတွေကို ရှောလု သွားတိုက်တော့ ရှမွေလက ‘သူတို့မှာရှိသမျှ အကုန်ဖျက်ဆီးပါ’ လို့ မှာတယ်။ ဒါပေမဲ့ ရှောလုက ဘုရင်အာဂတ်ကို မသတ်ဘူး။
ဒါနဲ့ ရှမွေလကို ယေဟောဝါက ‘ရှောလု ငါ့ကို စွန့်သွားပြီ။ ငါ့စကားနားမထောင်ဘူး’ လို့ပြောတယ်။ ရှမွေလ ဝမ်းနည်းသွားတယ်။ ဒါနဲ့ ရှောလုကို ရှမွေလက ‘မင်း ယေဟောဝါစကား နားမထောင်တော့တဲ့အတွက် နောက်ထပ် ဘုရင်တစ်ပါးကို ထပ်ရွေးလိမ့်မယ်’ လို့ ပြောပြီး လှည့်ထွက်သွားတဲ့အခါ ရှောလု လှမ်းဆွဲလိုက်တော့ ရှမွေလရဲ့ ဝတ်ရုံ စုတ်ပြဲသွားတယ်။ အဲဒီအခါ ရှမွေလက ‘ယေဟောဝါဟာ ဘုရင့်အာဏာကို မင်းဆီကနေ ရုပ်သိမ်းမယ်’ ဆိုပြီး ပြောတယ်။ ယေဟောဝါကို ချစ်ပြီး နာခံမယ့်သူကို နိုင်ငံပေးတော့မှာ ဖြစ်တယ်။“နာခံတာဟာ ပူဇော်သက္ကာထက် ပိုကောင်းတယ်။”—၁ ရှမွေလ ၁၅:၂၂