Vutuhu Yehova ua hele vaIsaleli vangazi ku va tuamenena, vunoni va tondele muangana. Va lekele Samuele nguavo: ‘Vifuti viose via tu zingilika via kala na vamiangana. Netu tu tonda muangana.’ Samuele ua muene ngecize va na lingi vuhenge, ngeci ua vundilile kuli Yehova ku tuala ha cimpande caco. Kaha Yehova ua mu lekele ngueni: ‘Vantu kati yove vali na ku viana. Vali na ku nji viana ange. Va leke nguove citava va kale na muangana, vunoni muangana uaco a ka va kakateya ku linga viuma via vingi.’ Vunoni cipue ngoco, vantu va handekele nguavo: ‘Vitanga viahi! Tu tonda muangana!’

Yehova ua lekele Samuele ngueni umo yala ua lizina Saulu ikeye a ka pua muangana ua katete. Omo Saulu ua ile kuli Samuele ku Lama, Samuele ua vuavesele Saulu ku pua muangana mu ku mu muaniena mazi ha mutue.

Mu nima ya ntsimbu, Samuele ua kunguluile vaIsaleli linga a va lekese muangana uavo ua muha. Vunoni ka va hasele ku uana Saulu. Ua tantekeya omo lia vika? Muomu ua vandele ha kati ka vikuata. Kaha mu va mu uanene, va mu nehele na ku mu imika ha kati ka mbunga. Saulu ua puile ua laha ku hiana vantu vose, kaha ua puile ua cili cikuma ku muvila. Mu nima yaco, Samuele ua handekele ngueni: ‘Ou ikeye muangana ua na hangula Yehova.’ Kaha vantu va tambekele nguavo: ‘Muangana, yoya miaka ya ingi!’

Ku vuputukilo, Muangana Saulu ua kele na ku halakana kuli Samuele na ku ononoka Yehova. Vunoni ua alulukile. Ca ku muenako, muangana ka pandele ku linga vikombelo. Vutuhu ngoco, tangua limo Samuele ua lekele Saulu a mu lavelele, vunoni Samuele kezile vuasi. Ngeci Saulu lingile cikombelo ikeye ivene. Vati ua lingile Samuele? Ua mu lekele ngueni: ‘Nga u na ononokele Yehova.’ Vuno Saulu ua lilongeseleho vimo ha cipenga ceni ni?

Houe. Muomu mu nima ya ntsimbu, omo Saulu ua ile mu ku lua na vakua Amaleke, Samuele ua mu lekele ku tsiha vose, ka pandele ku seza na umo uahi. Vunoni Saulu ua sezeleho muangana Angange. Yehova ua lekele Samuele ngueni: ‘Saulu na nji mbila kuti, ke ku nji  halakana naua.’ Samuele ua vuile vusiua vua kama, kaha ua lekele Saulu ngueni: ‘Yehova a hangula muangana ueka, muomu u na likela ku mu ononoka.’ Omo Samuele ua tengulukile linga a hilukemo, Saulu ua mu kuatele ku cikovelo, kaha ca tavuka. Ngeci Samuele ua mu lekele ngueni: ‘Yehova na tavula vuangana kuli ove.’ Yehova ua hanguile muntu ueka uze ua mu lemene na ku mu ononoka, linga a mu hane vuangana.