Jehovha wakapa vaIziraeri vatongi kuti vavatungamirire, asi ivona vaida mambo. Ivona vakati kuna Samueri: ‘Majinja ese akatitendeneja ano majimambo. Itusu tinodavo’. Samueri wakanyangajwa ndizvona, ngokudaro wakaita mukumbiro kuna Jehovha. Jehovha wakamubvunja kuti: ‘Vandhu ava avazivi kuramba iwewe. Ivona vakaramba inini. Vabvunjei kuti vangawana mambo asi mambo wondhowo anozovakumbira zviro zvizinji.’ Pikija zvakadaro, ivona vakati: ‘Azvina ndava. Tinoda mambo!’

Jehovha wakabvunja Samueri kuti mwanarume anodanijwa Sauri waizova mambo wokutanga. Sauri paakaenda koobvakacira Samueri ku Ramaa, Samueri wakazoja Sauri inga mambo ngo kumudururira mafuta pa musoro.

Mu kufamba ko nguva Samueri wakadanija vaIziraeri kuti avatatije mambo wavo mupsa. Asi ivona avazivi kuwana Sauri pa ndau iri yese. Unozviziva ngenyi? Ngokuti iyena wainga wakafindara pakati po mujiyo. Pakupejisira vakawana Sauri, vakamutora vomuviisa pakati po vandhu. Sauri wainga wakareba kupinda vese vaingepo zve waiseja maningi. Samueri wakati: ‘Vonanyi wiya wakasanwa ndi Jehovha’. Vandhu vakamima veciti: ‘Mambo ngaararame!’

Pakutanga Mambo Sauri wakazwira Samueri zve wakazwira mutemo ja Jehovha. Asi wakazocinja. Inga muezaniso, mambo aacaidikana kupira mupiro. Pa mukuvo umweni, Samueri wakabvunja Sauri avetere kuviya kwake, asi Samueri aazivi ku kasika kuviya. Ngo kudaro, Sauri wakatema civaringo co kupira muripo. Samueri wakazvivona kudini? Iyena wakati kwaari: ‘Iwewe aucaidikana kutama kuzwira Jehovha’. Sauri wakazojijenyi ngo kuposa kwake?

Pa kufamba ko nguva, Sauri paakaenda kohwisana no vaAmareki, Samueri wakamubvunja kuti acaidikana kusia umwe wavo ari penye. Asi Sauri wakatema civaringo cokutama kuuraya mambo Agagi. Jehovha wakati kuna Samueri: ‘Sauri wandiramba, iyena  aacandizwiri.’ Samueri wakanyagajwa maningi ndizvona, zve wakabvunja Sauri kudari: ‘Ngokuti wasiya kuzwira Jehovha, iyena anozosana mambo umweni.’ Samueri paakasika kuti apinde, Sauri wakamubata ngo kumbhiri ko nguvo yake zve nguvoyo yakamweka. Perapo Samueri wakati kuna Sauri: ‘Jehovha wabvisa umambo kwauri.’ Jehovha ari kuda kupa umambo mundhu umweni uwo anomuda no kumuzwira.