Jehova okwa li a pe Aaisraeli aatokolihapu ye ya wilike, ihe oya li ya hala omukwaniilwa. Oya lombwele Samuel ya ti: ‘Iigwana ayihe ye tu kunduka oyi na aakwaniilwa, natse otwa hala omukwaniilwa.’ Samuel okwa li u uvite kutya shika osha puka, onkene okwa galikana kuJehova. Jehova okwa ti kuye: ‘Aantu hangoye ya tindi, ongame ya tindi. Ya lombwela kutya otaya vulu okukala ye na omukwaniilwa, ihe ote ke ya pangela.’ Aantu oya ti: ‘Aawe! Tse otwa hala omukwaniilwa.’

Jehova okwa lombwele Samuel kutya omulumentu gwedhina Saul oye ta ka ninga omukwaniilwa gwawo gwotango. Saul sho a ka talela po Samuel kuRama, Samuel okwa gwayeke Saul a ninge omukwaniilwa, sho e mu tile omagadhi komutse.

Konima yethimbo, Samuel okwi ithana Aaisraeli e ya ulukile omukwaniilwa gwawo omupe. Ihe kaya li ye mu wete. Owu shi kutya omolwashike kaaya li ye mu wete? Oshoka okwa li e ya holama konima yomatemba. Sho ye mu mono, oye mu eta, e taye mu thikameke mokati koshigwana. Saul okwa li omule e vule kehe gumwe nokwa li e na ondjelo ombwanawa. Samuel okwa ti koshigwana: ‘Omulumentu oye nguka a hogololwa kuJehova.’ Aantu oyi igidha taya ti: ‘Omukwaniilwa na kale aluhe e na omwenyo!’

Petameko omukwaniilwa Saul okwa li a pulakene kuSamuel nokwa vulika kuJehova. Ihe konima okwa ka lunduluka. Pashiholelwa, omukwaniilwa Saul ka li e na okuyamba omafikilondjambo. Oshikando shimwe, Samuel okwa li a lombwele Saul e mu tegelele e ye, ihe Samuel ine ya mbala. Saul okwa tokola oye a yambe omafikilondjambo. Samuel okwi inyenge ngiini? Okwe mu lombwele a ti: ‘Ino vulika kuJehova.’ Mbela Saul okwi ilonga mo sha ngaa mepuko lye?

Konima sho Saul a yi a ka kondjithe Aayamaleki, Samuel okwe mu lombwele kaa hupithe po nando ogumwe. Saul okwa tokola a hupithe omukwaniilwa Agag. Jehova okwa lombwele Samuel a ti: ‘Saul okwa pilamene ndje noina pulakena ndje.’ Samuel okwa li a geya noonkondo  e ta ti kuSaul: ‘Molwaashono owe etha po okuvulika kuJehova, Jehova ota ka hogolola omukwaniilwa gulwe.’ Sho Samuel a punguluka a thige po Saul, Saul okwe mu kwata konguwo, e tayi tuuka. Opo ihe Samuel okwa lombwele Saul a ti: ‘Jehova okwe ku kutha uukwaniilwa.’ Jehova ote ke wu gandja kugulwe ngoka ta ka kala e mu hole nota vulika kuye.