No ituyu Yehowa ndra sanguhuku ba wondröniaʼö iraono Gizaraʼeli. Hizaʼi omasi ira na so razora. Lamane khö Zamueli, ’Soi tanö böʼö so razora. Omasiga göi simane daʼö.’ Hulö lö baga daʼö moloʼö Samueli, tobali mangandrö ia khö Yehowa. Imane khönia Yehowa, ’Tenga yaʼugö nitimbagöra, hizaʼi yaʼo. Fatunö khöra wa tola so razora, hizaʼi oya dania niʼandrö razo andrö khöra.’ Hewaʼae simanö, lö ibe dödöra ba hasambalö omasi ira na so razora.

Iwaʼö Yehowa khö Zamueli wa ira matua sotöi Saulo dania zi tobali razo siföföna. Me möi Zaulo ba wamalukhaisi Samueli ba Rama, ibayoini ia Samueli tobali razo ba ibeʼe wanikha ba högönia.

Aefa daʼö, iwaʼö Samueli ba ndraono Gizaraʼeli enaʼö owulo ira ba iʼombakhaʼö khöra razora. Hizaʼi lö hadöi Saulo ba daʼö. Hadia öʼila hezo möi ia? No ibiniʼö ia ba gotalua gama-gama. Me lasöndra Zaulo, laʼohe ia ba lafezizio ba gotalua niha sato. Abölö alawa Zaulo moroi ba niha sato fefu ba no siga-siga. Imane Samueli, ’Daʼa niha nifili Yehowa.’ Omuso dödö niha sato me laʼila razora andrö.

Ba wamobörö, ifondrondrongo niwaʼö Zamueli Razo Saulo ba iʼataʼufi Yehowa. Hizaʼi ba gafuriata lö moloʼö ia saʼae. Duma-dumania, tebai ibeʼe zumange menaʼö Saulo sindruhunia. No iwaʼö Samueli khö Zaulo enaʼö ibaloi ia. Börö me lö si tohare Zamueli, andrö maoso Zaulo ibeʼe zumange andrö. Börö daʼö imane khönia Samueli, ’Sindruhunia, sökhi menaʼö na moloʼö ndraʼugö khö Yehowa.’ Hadia ifalalini gera-erania Saulo?

Samuza maʼökhö me möi isuwö niha Gamaleki Saulo, iwaʼö khönia Samueli enaʼö ahori ibunu fefu niha Gamaleki. Hizaʼi, lö ibunu Saulo razo Gamaleki sotöi Agagi. Börö daʼö imane Yehowa khö Zamueli, ’Lö moloʼö saʼae Zaulo, lö irongo wehedegu.’ Abu sibai dödö Zamueli ba imane khö Zaulo, ’Börö me lö örongo saʼae niwaʼö Yehowa, ifataro razo si bohou.’ Me mofanö Zamueli, igogohe Saulo mbaru Zamueli  irege asika. Imane Samueli, ’Simane nukha sasika daʼa, iheta khöu Yehowa waʼarazo.’ Ibeʼe wamatörö andrö Yehowa ba niha sangomasiʼö ba sangataʼufi yaʼia.