Jiihóvah éí Ízrel dineʼé ándahwiiʼaahii dabéeʼéeshgo há niyiiznil, ákondi tʼáá bí binaatʼáanii deinízin ńtʼééʼ. Ízrel dineʼé Sámuel ádeidííniid: ‘Nihináágóó kéédahatʼínígíí éí binaatʼáanii dahólǫ́, nihí ałdóʼ naatʼáanii łaʼ daniidzin.’ Díí dajókeedígíí Sámuel doo bił yáʼátʼééhgóó biniinaa Jiihóvah yichʼįʼ sodoolzin. Jiihóvah éí Sámuel ííłní: ‘Shí doo dashiniizı̨́įʼ da, ni éí doo ádaniłníi da. Naatʼáanii nihee hodooleeł bidiní, ndi ayóó ádídahólníihgo nidanihiniłkaad doo.ʼ

Jiihóvah éí Sámuel ííłní, hastiin Saul wolyéhígíí éí áłtsé naatʼáanii dooleeł. Áko Réímahdi Saul éí Sámuel baazhníyáago hatsiiʼkáa’gi akʼah yayiiziidgo naatʼáanii jizlı̨́ı̨́ʼ.

Saul éí Ízrel binaatʼáanii silı̨́įʼgo, Ízrel dineʼé bił ííshjání ázhdoolííł biniyé Sámuel éí diné áłah ájiilaa. Ndi Saul chʼééh hadazhnitá. Háadishąʼ bikʼidazhneeztą́ą́ʼ? Éí hééł bitahgi nídéestʼı̨́ı̨́ʼ lá. Áádę́ę́ʼ hoł nidaaskaigo diné ałníiʼgi dabijiisįʼ. Éí ayóó ajíníłnéezgo haa dzólníigo haa ákodaniizı̨́ı̨́ʼ. Sámuel ání: ‘Díí Jiihóvah nihá néidiiłtı̨́.ʼ Áko diné hadadeeshghaazhgo ádaaní: ‘Naatʼáanii nízaadgóó hináa leʼ!’

Naatʼáanii Saul éí Jiihóvah dóó Sámuel yikʼeh hółʼı̨́ı̨́ ńtʼééʼ, ndi doo akʼeh hojííłʼįįd da. Naatʼáanii jílı̨́įgo éí nááʼiiłniih doo haa deetʼą́ą da, áko Sámuel éí shibaʼ sínídá hodííniid. Sámuel doo hah yíghááhgóó Saul nááʼiisniiʼ. Sámuel díí bikʼee haajiidzaa? Sámuel áháłní: ‘Jiihóvah bikʼeh honíłʼı̨́į doo ńtʼééʼ.ʼ Saul ajisiih yę́ę bitsʼą́ą́dóósh íhojiiłʼą́ą́ʼ?

Saul éí Ámalek dineʼé bił daʼahoogą́ąʼgo ałtso nidadoołtsił hoʼdooʼniid. Ndi Ámalek dineʼé biNaatʼáanii Éígag tʼáadoo jiisxı̨́į da. Áko Jiihóvah éí Sámuel ííłní: ‘Saul shitsʼá níyáago doo shíistsʼą́ąʼ da sílı̨́ı̨́ʼ.ʼ Sámuel yínííł nilı̨́įgo Saul ííłní: ‘Jiihóvah doo bikʼeh honíłʼı̨́ı̨́góó biniinaa náánáłaʼ naatʼáanii íidoolííł.ʼ  Sámuel hatsʼą́ąjįʼ dah diiyáago, Saul éí Samuel biʼééʼ yizjihgo ayíízǫ́ǫ́z. Sámuel éí Saul áyidííniid: ‘Jiihóvah éí díí nahatʼaʼ nighaideetʼą́.’ Áko ayóóʼábóʼníigo bikʼeh hółʼínígíí nahatʼaʼ yeididooʼááł.