Jeova waavela ova Isilayeli omukoyesi opo evehongolele, mahi ova Isilayeli ankho vahanda ohamba. Avapopila Samuele okuti: ‘Omalongo aeho ekahi popepi nonthue ena onohamba. Nonthue tuhanda ohamba.’ Samuele elitehelela omapita, elikuambela ku Jeova konthele yotyo. Jeova emupopila okuti: ‘Ovanthu haveko vekahi nokuanya. Vekahi nokuanya ame. Vepopila okuti vapondola okukala nohamba, mahi mavakala novitateka ovinyingi pokati kavo.’ Mahi ovanthu avati: ‘Onthue katuesukile. Tuhanda vala ohamba!’

Jeova apopila Samuele okuti enyina liomulume makala ohamba yotete o Saulu. Etyi Saulu akatalela-po Samuele ko Ramaam, Samuele alembula Saulu akale ohamba etyi emunengulila omulela komutwe.

Konyima Samuele aihana ova Isilayeli aveho opo evelekese ohamba yavo omphe. Mahi ankho kavepei apa Saulu eli. Ove utyii omokonda yatyi? Omokonda ankho waholama. Etyi vavasa Saulu atalama pokati kovanthu. Mahi Saulu ankho omulaale kovanthu aveho tupu ankho omuwa unene. Samuele ati: ‘Oyou Jeova aholovona.’ Ovanthu avapopila peulu okuti: ‘Ohamba ikaleko apeho!’

Potete Ohamba Saulu ankho itehelela Samuele tupu ankho itavela ku Jeova. Mahi konyima apiluluka. Mongeleka, ohamba kaipondola okulinga otyilikutila. Monthiki imwe Samuele wapopila Saulu opo emukevele, mahi Samuele asete. Saulu alingi otyilikutila. Oityi Samuele emupopila? Wati: ‘Ove ñgeno wetavelele ku Jeova.’ Okuti Saulu una etyi elilongesila koviponyo viae?

Konyima etyi Saulu akalwa no va Ameleke, Samuele apopila Saulu okuti uhase-po nawike nomuenyo. Mahi Saulu ahaipaa Ohamba Agage. Jeova apopila Samuele okuti: ‘Mandyipake  Saulu kokumbili kuange kekahi nokunthavela.’ Samuele anumana iya akapopila Saulu okuti: ‘Mokonda wayekapo okutavela ku Jeova, Jeova maholovona ohamba onkhuavo.’ Samuele akondoka iya Saulu akuate motyikutu tya Samuele. Samuele apopila Saulu okuti: ‘Jeova mekupolo ouhamba.’ Jeova maavela ouhamba omunthu umuhole tupu umutavela.