Jehova haud de Israeliten Rechtasch jejäft toom dee leiden, oba dee wullen eenen Kjennich. Dee säden to Samuel: “Aule Velkja rom ons haben eenen Kjennich. Wie wellen uk eenen.” Samuel docht soo, daut wia orrajcht, un bäd to Jehova äwa dise Sach. Jehova säd to am: “Daut es nich, daut dee die nich wellen. Daut Volkj well mie nich. Saj to dee, see kjennen eenen Kjennich haben, oba dee woat väl von an velangen.” Oba dee säden bloos: “Daut es ons endoont. Wie wellen eenen Kjennich!”

Jehova säd to Samuel, daut een Maun, waut Saul heet, de ieeschta Kjennich sennen wudd. Aus Saul no Rama kjeem un bie Samuel wia, goot Samuel dän Saulweelj äwa dän Kopp toom wiesen, daut Saul de Kjennich wia.

Lota roopt Samuel de Israeliten toop toom dee äaren Kjennich wiesen. Oba dee fungen Saul doa noanich. Weetst du, wuarom nich? Dee haud sikj manke Doosen vestoaken. Aus dee dän dan ieescht fungen, brochten see dän un stalden dän medden manke Menschen. Saul wia jrata aus aule aundre un am sach sea schmock. Samuel säd: “Kjikjt, disen haft Jehova jewält.” Daut Volkj schrieech: “Mucht de Kjennich lang läwen!”

Aum Aunfank horcht de Kjennich Saul no Samuel un wia Jehova jehuarsom. Oba dan endad sikj daut. Biejlikj sull Saul nich selfst waut oppem Aultoa opfren. Samuel haud to Saul jesajcht, daut dee wachten sull, bat hee bat doa wia. Oba Samuel kjeem nich fuaz. Doawäajen docht Saul soo, hee wudd selfst opfren. Waut deed Samuel dan? Hee säd to dän: “Du hautst Jehova nich sult ojjehuarsom sennen.” Lieed Saul doa waut von?

Lota deed Saul jäajen de Amalekita Kjrich fieren. Samuel säd, hee sull dee aula dootmoaken. Oba Saul leet dän Kjennich Agag läwen. Jehova säd to Samuel: “Saul haft sikj von mie wajchjedreit un horcht nich no mie.” Samuel wia sea truarich un säd to Saul: “Wäajens du Jehova nich mea jehorchen deist, woat dee sikj eenen aundren  Kjennich wälen.” Aus Samuel sikj omdreid un wajchgonen wull, wull Saul dän fausthoolen un reet dän Raunt von Samuel sienen Äwarock twei. Dan säd Samuel to Saul: “Jehova haft daut Kjennichrikj von die wajchjeräten.” Jehova wudd daut Kjennichrikj wäm jäwen, waut am leewen un jehorchen wudd.