Jehová uyaʼom chi ri ajqʼatal taq tzij chke ri israelitas rech kkʼam kibʼe, are kʼu ri e are kkaj jun ajawinel. Rumal laʼ, xkibʼij che ri Samuel: «Ronojel ri e nikʼaj chi tinamit kʼo kajawinel, oj kqaj jun ajawinel». Ri Samuel xrilo che utz ta ri kkaj kkibʼano. Tekʼuriʼ xubʼan uchʼawem che ri Jehová, Jehová xubʼij che: «Ri tinamit tajin ta katkixutuj at, tajin kinkixutuj in. Chabʼij chke kekunik kkʼojiʼ jun kajawinel, are kʼu ri ajawinel riʼ kutaʼ kʼi jastaq chke». Are kʼu, ri winaq kkibʼij: ¡Kʼo ta kubʼano! ¡Kqaj kkʼojiʼ jun qajawinel!

Tekʼuriʼ, Jehová xubʼij che ri Samuel che jun achi ubʼiʼ Saúl kux ri nabʼe ajawinel. Are chiʼ Saúl xbʼe che usolixik ri Samuel pa Ramá, Samuel xuchaʼo, xutix aceite pa ujolom, rech kqʼalajinik che are ri ajawinel.

Tekʼuriʼ, Samuel xeʼumulij ri e israelitas rech kketaʼmaj uwach ri kʼakʼ kajawinel. Are kʼu kkiriq ta ri Saúl pa nijun lugar. ¿La awetaʼm jasche? Rumal che ukʼuʼm ribʼ chkixoʼl kʼi taq jastaq. Are chi xriqtajik, xesax lo chilaʼ xuqujeʼ xtakʼabʼax chkixoʼl ri tinamit. Are más nim raqan chkiwach ri nikʼaj chik xuqujeʼ sibʼalaj jeʼl ri ukayebʼal. Samuel xubʼij: «Chiwilampeʼ jachin ri xuchaʼ ri Jehová». Xuqujeʼ ri winaq xkiraq kichiʼ: «¡Chyoq uqʼij ri ajawinel!».

Nabʼe, ri ajawinel Saúl kubʼan ri kubʼij ri Samuel che xuqujeʼ kunimaj ri Jehová. Are kʼu xukʼexo. Jumul, Samuel xubʼij che Saúl che kreyej na rech kuya ri tabʼal toqʼobʼ. Ri ajawinel yaʼom ta che kuya tabʼal toqʼobʼ. Are kʼu Samuel xopan ta chanim, rumal laʼ utukel Saúl xuya ri tabʼal toqʼobʼ. ¿Jas xubʼan Samuel? Xubʼij che: «Rajawaxik kanimaj ri Jehová are kʼu xabʼan taj». ¿La xretaʼmaj ri Saúl che rajawaxik che amaqʼel kunimaj ri Jehová?

Qʼaxinaq chi ri qʼij, Saúl xbʼe che chʼoj kukʼ ri amalequitas, xuqujeʼ Samuel xubʼij che, kʼo ta nijun kukʼasbʼa kanoq. Are kʼu ri Saúl xukamisaj ta ri ajawinel Agag. Rumal laʼ Jehová xubʼij che Samuel: «Saúl xinuya kanoq, kinunimaj ta chik». Samuel sibʼalaj xbʼisonik, rumal laʼ xubʼij che Saúl: «Jehová kuchaʼ chi jun ajawinel rumal che at  kanimaj ta chik». Are chiʼ ri Samuel xbʼek, Saúl xuchap che ri uxeʼ ri ratzʼyaq, xuqujeʼ xuraqʼchij. Samuel xubʼij che Saúl: «Je waʼ kubʼan ri Jehová che resaxik ri ajawbʼal chawe». Wariʼ kraj kubʼij che ri Jehová kuya ri ajawbʼal che jun winaq chik che kuloqʼoqʼej xuqujeʼ kunimaj.