Jehoväqa israelïtakunata pushanampaqmi juezkunata churarqan, peru israelïtakunaqa reyyoq këtam munayarqan. Tsëmi Samuelta kënö niyarqan: “Juk nacionkunaqa reyyoqmi kayan, tsënöllam noqakunapis reyyoq këta munayä”. Samuelqa mana allitanömi tsëta rikarqan. Tsëmi Jehoväman mañakurqan, y Jehoväqa kënömi nirqan: “Israelïtakunaqa manam qamtatsu despreciëkäyäshunki, sinöqa noqatam. Reyyoq kayänampaq kaqta nï, peru tsë reyninkunaqa imëkata exiginampaq kaqta willë”. Tsënam israelïtakunaqa kënö niyarqan: “¡Tsënö kanan kaptimpis, reyyoq këtam munayä!”.

Tsënam Jehoväqa Samuelta nirqan punta kaq reyqa Saul jutiyoq nuna kanampaq kaqta. Juk kutim Samuelta watukaq Ramä markaman Saul ëwarqan, tsëchömi rey kanampaq peqanman aceitita Samuel jichapurqan.

Nïkurmi Samuelqa llapan israelïtakunata qayatsirqan reyninkuna pï kanampaq kaqta willanampaq. Peru Saulqa bultukuna rurinmanmi ratakïkushqa (tsinkaykushqa) karqan, tsëmi ni pipis tarita puëdirqantsu. Alli ashïkur-ran taririyarqan, nïkurmi jorqarirnin llapan nunakunapa chowpinman apayarqan. Pëqa llapan nunakunapitapis mas jatun y mas shumaqllanmi karqan. Samuelqa kënömi nirqan: “Rikäyë, pëtam Jehovä akrashqa”. Y nunakunaqa alläpam kushikuyarqan.

Rey tikranqan witsanqa Saulqa wiyakoqmi karqan. Samueltawan Jehovätam cäsukoq. Peru tsëpitaqa jukläyam tikrakurirqan. Juk kutim Samuelqa “ofrendata ruranapaq shuyämanki” nirqan Saulta. Reykunaqa manam puëdiyaqtsu ofrendakunata rurëta. Peru Samuel mana ras chaptinmi Saulqa kikinlla ofrendata rurar qallëkurqan. Y Samuel chärirqa, ¿ima nirqantaq? “Jehovätam wiyakunëki kashqa, peru manam wiyakurqunkitsu” nirqanmi. ¿Saulqa yachakurqantsuraq Jehoväta wiyakunan imëpis precisanqanta?

Tsëpitaqa Amaleq nunakunawan pelyaqmi Saul ëwarqan. Y Samuelqa llapan nunakunata wanutsiyänampaqmi Saulta nirqan. Peru Saulqa  manam rey Agagta wanutsirqantsu. Tsëmi Jehoväqa Samuelta kënö nirqan: “Saulqa jaqiramashqam, manam cäsumannatsu”. Samuelqa alläpa llakishqam sientikurqan, tsëmi Saulta kënö nirqan: “Mana wiyakoq tikrakurishqa kaptikim Jehoväqa juktana rey kanampaq akranqa”. Tsënö nirir kutikïkaptinmi Saulqa röpampita tsaripukurnin röpanta rachiratsirqan. Tsënam Samuelqa kënö nirqan: “Tsënöllam Jehoväpis rachishoqniki cuenta rey kënikipita jorqarishunki”. Tsënö nirmi rikätsikurqan Jehoväta rasumpa kuyaq y cäsukoq kaqna rey kanampaq kaqta.