Jehová Diosqa juezkunawanmi Israel llaqtanta pusariran, runakunan ichaqa juj reyta mañakuranku. Chaymi Samuelta niranku: “Llapa nacionkuna jinan reyniyoq kayta munayku”, nispa. Samuelqa manan allinpaqchu chayta qhawariran, jinan Diosmanta mañakuran, Diostaq niran: “Kay runakunaqa manan qantachu negasunkiku, aswanpas noqatan negawanku. Paykunaman willay reyqa imaymanata mañananta”, nispa. Chaywanpas runakunan niranku: “¡Manan imananpaschu! ¡Reyniyoqmi kayta munayku!”, nispa.

Jinan Jehová Diosqa Samuelta kamachiran Saulta ajllananpaq. Ramá llaqtaman Saúl jamuqtinmi Samuelqa aceitewan umanpi jich’aykuran rey kananpaq.

Chay qhepamantaq Samuelqa Israel llaqtata juñuran reyninkuta reqsichinanpaq. Saultan ichaqa mana maypipas tarirankuchu. ¿Imarayku? Q’epikuna kasqanpi pakakusqanrayku. Saulta tarispankun runakuna rikunanpaq pusamuranku. Payqa llapankumantapas aswan jatunmi karan, sumaq rijch’ayniyoqtaq karanpas. Jinan Samuelqa niran: “Qhawariychis Jehová Diospa ajllakusqan reyta”, nispa. Runakunataq niranku: “¡Kausachun reyninchis!”, nispa.

Qallariypiqa Saulqa kasukuranmi Jehová Diosta Samueltapas. Chaymantan ichaqa manaña kasukuranchu. Juj kutinmi Samuelqa Saulta niran Diosman sacrificiota jaywananpaq suyananta. Samuel mana usqhayta jamuqtintaq Saúl sacrificiota jaywaran. Jinan Samuelqa niran: “Jehová Diostan kasukunayki karan, manataqmi chaytachu ruwanki”, nispa. Chay qhepaman, ¿yacharanchu Diosta kasukunanpuni kasqanta?

Chaymantan Saulqa Amaleq runakunawan maqanakuq riran, Samuelmi niran llapankuta wañuchinanpaq. Saulmi ichaqa rey Agagta mana wañuchiranchu. Jinan Jehová Diosqa Samuelta niran:  “Saulqa manan kasuwanñachu”, nispa. Samuelqa sinchita llakikuspan Saulta niran: “Jehová Diosmi juj reyta qanpa rantiykipi ajllanqa, mana kasukuq kasqaykirayku”, nispa. Samuel ripushaqtinmi Saulqa p’achanmanta jap’iruspa p’achanta llik’iran. Jinan Samuelqa niran: “Chhaynatan Jehová Diosqa rey kasqaykita qechusunki”, nispa. Chay reymi ichaqa Diosta kasukunan karan.