О Јехова денѓа е Израелцонге судие те водинен лен, ама ола родинѓе цари. Адалеске вакерѓе е Самоилеске: „Са о народија околу аменде иси лен царија. Амен да мангаја те овел амен цари“. О Самоил џанља кај адава тано погрешно, хем адалеске молинѓа пе е Јеховаске. О Јехова вакерѓа леске: „О мануша на отфрлинена тут, него ман. Вакер ленге кај ка добинен цари, ама адава цари ка родел лендар бут буќа“. Иако џанена сине адава, ола вакерѓе: „Нане аменге гајле. Амен мангаја цари!“

О Јехова вакерѓа е Самоилеске кај о прво цари ко Израел ка овел јекх мануш со викинела пе Саул. Кеда о Саул гело ко Самоил ки Рама, о Самоил помазинѓа е Сауле, или чхивѓа ле те овел цари адалеа со чхорѓа леске упро шеро масло.

Пало адава, о Самоил викинѓа е Израелцон те кхеден пе те сикавел ленге е неве царе. Ама, нашти сине те аракхен е Сауле нигде. Џанеа ли соске? Адалеске со гаравела пе сине. Кеда аракхле ле, анѓе ле машкар о народо. О Саул сине најучо саринендар хем сине бут шужо. Тегани о Самоил вакерѓа: „Дикхен касте о Јехова биринѓа те овел цари“. Кеда дикхле о мануша е царе сине бут радосна.

Ко почеток, о цари, о Саул шунела сине е Самоиле хем сине верно е Јеховаске. Ама, пало несаво време менинѓа пе. На пример, о цари на ваљани сине те дел жртве. Ки јекх прилика, о Самоил вакерѓа е Саулеске те аџикерел ле те авел, ама о Самоил на ало одма. Адалеске, о Саул одлучинѓа те дел ов и жртва. Сар реагиринѓа о Самоил кеда дикхља акава? Ов вакерѓа леске: „Ваљанѓан те шуне е Јехова“. Дали о Саул таро акава сиклило кобор тано важно те овел послушно?

Пало несаво време, кеда гело о Саул те боринел пе е Амаличаненцар, о Самоил вакерѓа леске те мударел саринен. Ама, о Саул одлучинѓа те на мударел е царе Агаг. О Јехова вакерѓа е Самоилеске: „О Саул више на шунела ман“. О Самоил сине бут тажно, хем вакерѓа е Саулеске: „Адалеске со ту на шунеа е Јехова, ов ка биринел јавер цари“. Кеда о Самоил иранѓа пе  те џал песке, о Саул астарѓа ле тари наметка, ама и наметка цидиндили таро лескоро вас. Тегани о Самоил вакерѓа леске: „Исто сар ми наметка со цидиндили таро тло вас, аѓаар о Јехова авдиве ка цидел о царство таро тле васта“. О Јехова ка дел о царство некаске сој леске послушно хем со мангела ле.